Тахтлар ўйини: Филиппинда президент ва вице-президент ўртасидаги зиддият кучайди

Филиппин вице-президенти Сара Дутерте президент Фердинанд Маркос кичик, унинг рафиқаси ва собиқ парламент спикерига нисбатан жиддий таҳдидлар билдиргани бўйича суд қарори ортидан гаров пули тўлади. Бу ҳақда “Reuters” хабар берди.

Қайд этилишича, суд Дутерте учта жиддий таҳдид бўйича иш доирасида ҳибсга олиниши ҳақида қарор чиқарган. Ҳар бир айблов бўйича гаров пули 120 минг песо, жами 360 минг песо этиб белгиланган.

Дутерте суд биноси олдида ўнлаб полиция ходимлари қуршовида журналистларга ўзини хавфсиз ҳис қилмаётганини айтган. У полиция ва судларга ишонмаслигини билдириб, ҳокимиятни таъқибда айблаган.

“Агар гаров пулини тўласам, таъқиб тўхтамайди. Тўламасам, полицияга олиб кетишади. Мен полицияга ҳам, судларга ҳам ишонмайман. Ўзимни умуман хавфсиз ҳис қилмаяпман”, деган Дутерте.

У, шунингдек, агар “бу кеча ҳалок бўлса”, бунинг учун ким жавоб беришини сўраган ва полиция воқеани бахтсиз ҳодиса деб баҳолаб, жавобгарликдан четда қолишини айтган.

Полиция Дутертенинг бу айбловлари юзасидан изоҳ бериш сўровига дарҳол жавоб бермаган. Маркос маъмурияти ҳам унинг хавфсизлиги ҳақидаги баёнотларига муносабат билдирмаган. Бироқ президент офиси кеча, 4 сентябь куни суднинг ҳар қандай қарори ҳурмат қилиниши ҳақида маълум қилган.

Суд Дутертега қўйилган 3 та айбловнинг барчаси бўйича ишни кўриб чиқиш учун етарли асослар бор, деган хулосага келган.

Иш 2024 йил ноябридаги онлайн матбуот анжуманига бориб тақалади. Ўшанда Дутерте ўзига суиқасд қилинса, Президент Маркос, унинг рафиқаси Лиза Аранета Маркос ва ўша вақтда парламент спикери бўлган Мартин Ромулдесни ўлдириш учун ёлланма қотил билан гаплашгани ва унга кўрсатма берганини айтган. Кейинчалик у бу баёнотлар таҳдид бўлганини рад этган.

Мазкур айбловлар Дутерте юзасидан Сенатда кўрилаётган импичмент ишига ҳам киритилган. Вице-президент, шунингдек, давлат маблағларидан, жумладан, вице-президент ва Таълим вазири бўлган даврида нотўғри фойдаланганликда айбланмоқда. У бу айбловларни ҳам рад этган.

Дутерте шу билан бирга 2028 йилги президентлик сайловида иштирок этиш ниятини билдирган. Агар импичмент жараёнида айбдор деб топилса, у лавозимидан четлатилиши ва президентлик сайловида қатнашиш режаси барбод бўлиши мумкин.

Маълумот учун, Дутерте ва Маркос Филиппиндаги икки йирик сиёсий сулола вакиллари ҳисобланади. Улар 2022 йилда иттифоқ тузиб, сайловда ғалаба қозонган, аммо 2024 йилда муносабатлари кескин ёмонлашган.

Ҳозирги ҳуқуқий можаро икки сиёсий оила ўртасидаги зиддиятнинг навбатдаги кескинлашуви сифатида баҳоланмоқда.

Эслатиб ўтамиз, аввалроқ АҚШ ҳукумати Филиппин Қуролли кучларига 4 та Ocean Aero Triton автоном сувости ва сувусти аппаратини топширганди.