Тадбиркорлар учун жарима, тўлов ва йиғимлар кескин камайтирилади

Ўзбекистонда ишлаб чиқарувчи ва экспортчилар учун тўлов ҳамда йиғимлар кескин камайтирилади. Бу ҳақда бугун, 21 июль куни Президент Шавкат Мирзиёев жорий йилнинг биринчи ярмида эришилган натижалар ва йил якунигача қилинадиган ишлар муҳокамасига бағишланган видеоселектор йиғилишида мутасаддиларга топшириқ берди.

Йиғилишда давлат раҳбари одамлар бизнес бошлаб, экспортга чиқиши учун барча шароитлар яратилаётганини таъкидлаган.

Билдирилишича, ҳозир 51 та вазирлик ва идорада 322 та йўналишда молиявий жарима қўллаш ваколати бор. 2024-2026 йилларда қарийб 3 триллион сўмлик жарима қўлланилган.

Президент жазо қўллайдиган ташкилотлар масъулларининг онги ва дунёқараши ўзгариши зарурлигини таъкидлаган. Улар тадбиркорни жазолашдан олдин унга имконият бериш ва тўғри йўл кўрсатишни ўрганиши керак.

Ташқи бозорда рақобат кучаяётган шароитда ишлаб чиқарувчи ва экспортчилар учун тўлов ҳамда йиғимларни камайтириш масаласи ҳам кўтарилган.

Мисол сифатида бир фура гилосни экспорт қилишда божхона йиғими, фумигация, сертификат ва декларант хизмати учун 5 миллион сўмгача қўшимча харажат қилинаётгани айтилган.

Барча вазир ва тармоқ раҳбарларига бир ҳафтада тизимидаги бюрократия, жарима, тўлов ва йиғимларни кескин камайтириш, бизнес муҳитини яхшилаш бўйича таклифларни Президент Администрациясига киритиш топширилган.