Сурхондарёда супургилар ичидан 612 кг қорадори чиқди (фото)

north_east

ДХХ одам савдоси ва гиёҳвандликка қарши тадбирда 5 кишини ушлади

Кеча, 9 февраль куни ДХХ Чегара қўшинлари томонидан Божхона қўмитаси билан ҳамкорликда йирик миқдордаги гиёҳвандлик воситаларининг Ўзбекистонга олиб кирилишига қарши навбатдаги тадбирда 2986 дона супургининг дастаклари орасидан қорадори топилди. Бу ҳақда Давлат хавфсизлик хизмати хабар берди.

Сурхондарё вилоятидаги “Термиз автойўллари” халқаро ўтказиш пункти орқали Ўзбекистон ҳудудидан транзит тарзида ўтиш учун кириб келган юк автотранспорт воситасини белгиланган технологик схема асосида чегара назоратидан ўтказиш жараёнида мазкур автотранспорт воситасига ортилган 13,5 тонна оғирликдаги супурги ходимларнинг диққатини тортган.

Шундан сўнг, мазкур автотранспорт воситаси “Термиз автойўллари” халқаро ўтказиш пунктига туташ ҳудуддаги “Термиз” ташқи иқтисодий фаолият божхона пости тасарруфидаги божхона омборига келтирилиб, ундаги товарлар чуқурлаштирилган кўрикдан ўтказилган.

Аниқланишича, юк автотранспорт воситасига 180 та қопда супурги жўхориси ўсимлигидан тайёрланган 22 минг 500 дона хўжалик супургиси ортилган. Мазкур супургиларни синчиклаб кўздан кечириш давомида 2986 дона супургининг дастаклари орасига айнан супурги рангига мос равишда сариқ рангдаги скотч билан ўралган ўртача 25 сантиметр узунликдаги полиэтилен ўрамлар моҳирлик билан яширилгани фош бўлди. Ушбу ўрамлар белгиланган тартибда ва холислар иштирокида очиб кўрилганида, уларнинг айримлари ичига ўртача 200 грамм оғирликдаги ўткир ҳидли гиёҳвандлик воситасига ўхшаш модда яширилгани аниқланди.

Мазкур ҳолатда 2984 дона супурги дастакларидан ажратиб олинган ўрамлардаги ўткир ҳидли тўқ жигарранг гиёҳвандлик воситалари экспресс анализ натижаларига кўра, “гашиш” гиёҳвандлик моддаси экани аниқланди ва унинг оғирлиги ўрамлари билан бирга 612 килограммни ташкил қилади.

Эслатиб ўтамиз, аввалроқ Фарғона вилоятида гиёҳвандлик воситаларининг ноқонуний айланмасига қарши ўтказилган тезкор тадбирда 8 киши қорадори билан қўлга олинганди.