Суриялик исёнчилар Ҳалаб шаҳрини эгаллади

Суриядаги исёнчи кучлар мамлакатнинг иккинчи йирик шаҳри Ҳалабдаги бир нечта ҳудудларни ўз назоратига олди. Бу ҳақда “New York Times” хабар берди.

Суриянинг “Ҳаят Таҳрир аш-Шом” (ҲТШ) радикал гуруҳи жангарилари бошчилигидаги жангчилар ҳукумат назоратидаги ҳудудларга ҳужум бошлаган ва Ҳалаб шаҳрига етиб келган.

Сурия инсон ҳуқуқлари мониторинги маркази исёнчилар шаҳарнинг ярмидан кўпини назорат қилганини даъво қилмоқда. Сурия армияси Идлиб ва Ҳалабнинг қишлоқлари исёнчилар томонидан босиб олинган жойлар устидан назоратни тиклашга муваффақ бўлган. Ҳукумат, шунингдек, қўшимча кучлар Ҳалаб шаҳрига етиб келганини ва исёнчиларни қувиб чиқараётганини айтмоқда.

“Reuters”га кўра, Москва Дамашққа исёнчиларни тўхтатиш учун қўшимча ҳарбий ёрдам ваъда қилган. Маълум қилинишича, кейинги 72 соат ичида янги қуроллар кела бошлайди.

Туркия разведкаси билан боғлиқ манбаларнинг таъкидлашича, исёнчиларни қўллаб-қувватловчи Анқара ҳужумга яшил чироқ ёққан. Бироқ Туркия ТИВ вакили Онжу Кежели Туркия минтақадаги беқарорликдан қочишга интилаётганини, исёнчилар ҳужумлари эса эскалация шартномасини бузаётганини айтган.

Кремль тарафдорларига кўра, 29 ноябрь куни кечқурун Ҳалаб деярли бутунлай ҲТШ назорати остига ўтган. Жангарилар аллақачон шаҳар марказида ғалабани нишонламоқда.

Эслатиб ўтамиз, аввалроқ Суриянинг “Ҳаят Таҳрир аш-Шом” (ҲТШ) радикал гуруҳи жангарилари ва уларнинг иттифоқчилари Сурия армияси билан олиб борилган шиддатли жангларда мамлакат шимоли-ғарбидаги ўнлаб шаҳар ва қишлоқларни эгаллаб, Ҳалаб шаҳрига яқинлашгани ҳақида хабар берилганди.

Муҳаммад Ҳодиев