Сурияда ёнилғи нархи кескин ошди: аҳоли бош кўтарди (видео)

Сурияда дизель нархи 40 фоизга оширилиши мамлакат бўйлаб норозилик намойишларига сабаб бўлди ва бу Башар Асад ҳокимияти ағдарилганидан бери энг кенг кўламли намойишларга айланди. Бу ҳақда “Reuters” хабар берди.

Қайд этилишича, Сурия ҳукумати жорий йилнинг 12 август куни дизель нархини 40 фоизга ошириб, бир литрини 175 Сурия фунтига (1,32 доллар) етказган. Шундан сўнг, намойишчилар автомобиль шиналарини ёқиб, муҳим йўлларни, жумладан, пойтахт Дамашқни мамлакатнинг саноат маркази Ҳалаб билан боғловчи автомагистрални тўсиб қўйган.

Норозиликлар мамлакатда йиллар давом этган иқтисодий инқироз фонида юз берган. БМТ Тараққиёт дастури ҳисоб-китобларига кўра, сурияликларнинг 90 фоизи қашшоқлик чегарасидан пастда яшайди. Фуқаролар уруши бошланган 2011 йилгача эса бу кўрсаткич қарийб учдан бир қисмни ташкил этган.

Ҳукумат, шунингдек, маиший ва саноат газ нархларини қарийб 9 фоизга, 95 октанли бензин нархини 28 фоизга ошириб, 195 фунтга, 90 октанли бензин нархини эса 26 фоизга ошириб, 185 фунтга етказган.

Намойишчилар нефтьни қайта ишлаш заводларига йўл олган хом нефть ташувчи систерналар карвонларини ҳам тўсиб қўйган. Айрим норозилар Энергетика ва Иқтисодиёт вазирликлари раҳбарлари ҳамда Сурия нефть компанияси раҳбарининг истеъфосини талаб қилган.

Ҳалабдаги намойишчилардан бири Ёсир Салим “Reuters”га берган интервьюсида одамлар иш ҳақининг оширилишини эмас, дизель ва бошқа ёқилғи нархларининг пасайтирилишини истaётганини айтган.

Сурия Энергетика вазирлиги вакили Абдулҳамид Салатнинг маълум қилишича, нархларнинг оширилиши вақтинчалик чора бўлиб, бунга жаҳон бозоридаги харажатларнинг ортиши ва мамлакатнинг импортга кучли қарамлиги сабаб бўлган. Унинг айтишича, шароит ўзгарган тақдирда нархлар яна кўриб чиқилиши мумкин.

Сурия жорий йилда Россиядан кунига қарийб 60 минг баррель хом нефть импорт қилган. Бироқ Украинадаги ҳужумлар Россия нефтьни қайта ишлаш заводлари фаолиятига таъсир кўрсатиб, ишлаб чиқариш ҳажмини камайтирган ва Москва бензин ҳамда дизель экспортини чеклаган.

Нархларнинг сўнгги ошиши натижасида 95 октанли бензин февраль ойидан бери қарийб 86 фоизга, дизель эса икки баравардан кўпроққа қимматлаган. Шу даврда Брент маркали нефть нархи ҳам 44 фоизга ошиб, бир баррель учун 72,48 доллардан 104,61 долларгача кўтарилган.

Эслатиб ўтамиз, аввалроқ Суриянинг Идлиб вилоятидаги Сармада шаҳри яқинида қурол-яроғ ва урушдан қолган портловчи воситалар вақтинча сақланадиган омборда портлаш содир бўлгани ҳақида эълон қилинган эди.