Сўлчи Меленшон Францияда президентликка номзодини қўяди

Сўл қанот етакчиси Жан-Люк Меленшон Францияда келаси йил бўлиб ўтадиган президентлик сайловида иштирок этишини айтди. Бу ҳақда у кеча, 3 май куни TF1 телеканалига берган интервьюсида маълум қилди.

Мелоншон Францияданинг сўл қанотдаги “Бўйсунмас Франция” партияси етакчиси ҳисобланади. У 2012, 2017 ва 2022 йилларда ҳам сайловларда қатнашган. 2022 йилда Мелоншон ўнг қанот етакчиси Марин Ле Пен ва амалдаги Президент Эммануэль Макрондан кейин учинчи ўринни эгаллаган. 

“Ҳа, мен номзодман,” деган 74 ёшли сиёсатчи интервьюсида.

Меленшон ҳар бир сайловда овозлар улушини ошириб келмоқда. 2012 йилда у 11 фоиз овоз олган бўлса, сўнгги сайловда иккинчи босқичга чиқишга жуда яқин келиб, Ле Пендан атиги 1,2 фоизга ортда қолганди.

Сўлчилар ҳақида

“Бўйсунмас Франция” партияси (LFI) Исроил ва унинг Ғазодаги урушига қарши кескин танқидлари билан танилган. Меленшон бу ҳужумларни геноцид деб атаган ва Европа Иттифоқининг Исроил билан ассоциация келишувини тўхтатишга чақирган. Сўл қанот етакчиси Испаниянинг АҚШ–Исроилнинг Эронга қарши урушига қарши позициясини ҳам қўллаб-қувватлаган. LFI партияси кучли экологик қоидалар ва бойлар учун юқори солиқларни илгари сурувчи социалистик қарашларга эга партия ҳисобланади. Келаси йилги сайловда Макрон муддат чеклови сабабли қайта номзод бўла олмайди, Ле Пен эса сиёсатдан четлатилиш хавфи остида. Меленшоннинг LFI партияси эса “Янги халқ фронти” коалициясидаги энг йирик партия бўлиб, Миллий ассамблеяда учинчи энг катта блок ҳисобланади.

Макрон ҳокимятининг заифлашиши

2016 йилда “Renaissance” партиясини тузган марказчи сиёсатчи Макрон сўнгги йилларда иқтисодий ва сиёсий инқирозлар фонида жамоатчилик қўллаб-қувватловини йўқотиб боряпти. 2024 йилдаги парламент сайловларида ҳеч бир партия етарли овозлар қўлга кирита олмаганди. Бу эса ҳукуматни ишончсизлик вотуми хавфи остида қолдирганди. Бундан ташқари, сўнгги икки йилда Францияда бир неча ҳукуматлар ва бош вазирлар алмашгани сиёсий беқарорликни кучайтирди. Шу боис 2027 йилги сайлов очиқ курашга айланиши кутиляпти. Сайлов апрель ойида бўлиб ўтиши режалаштирилган.

Эслатиб ўтамиз, аввалроқ АҚШ Президенти Дональд Трамп франциялик мавқедоши Эммануэль Макрон тез орада ўз лавозимини тарк этиши ҳақида гапирган эди.

Ойбек Рустамов