Макрон тез орада лавозимидан кетади – Трамп

АҚШ Президенти Дональд Трамп франциялик мавқедоши Эммануэль Макрон тез орада ўз лавозимини тарк этишини айтди. Бу ҳақда у бугун, 17 март куни журналистлар билан суҳбатда сўз очди.

Журналистлар Америка Президентининг Ирландия Бош вазири Михол Мартин билан учрашувида Трампдан Макроннинг Париж Ҳормуз бўғозини қамалдан чиқаришда ёрдам бермаслигини қандай баҳолашини сўраган.

“У [Макрон] жуда яқин орада ўз лавозимини тарк этади”, дея жавоб берган Оқ уй раҳбари.

Маълумот учун, Макроннинг президентлик ваколатлари 2027 йил май ойида тугайди. Ҳозирда унинг иккинчи президентлик муддати давом этмоқда. Шу сабабли у 2027 йилги сайловларда қатнаша олмайди – Францияда бир киши кетма-кет икки муддатдан ортиқ давлат раҳбари лавозимини эгаллаши мумкин эмас.

Эслатиб ўтамиз, Ҳормуз бўғози Эрон томонидан ёпиб қўйилган. Бу АҚШ ва Исроил Теҳронга қарши ҳарбий амалиёт бошлаганидан кейин содир бўлди. Трамп аввалроқ НАТО давлатларига Ҳормуз бўғозини қамалдан чиқаришда ёрдам бериш илтимоси билан мурожаат қилган, бироқ қўллаб-қувватланмаган эди.

Европа Иттифоқида Трампнинг Ҳормуз бўғозида кемалар қатнови хавфсизлигини таъминлаш амалиётига қўшилиш ҳақидаги таклифи иштиёқсиз кутиб олинди. Хусусан, Германия канцлери Фридрих Мерц Эрондаги уруш “НАТОнинг иши эмас” деб баёнот берди. У шунингдек, Берлин Ҳормуз бўғозида хавфсизликни таъминлашда АҚШга ёрдам бермаслигини маълум қилди. Бундан ташқари, Европа Иттифоқининг ташқи ишлар бўйича Олий вакили Кая Каллас АҚШ ва Исроилни Эронга қарши урушни якунлашга чақирди. Бунинг ортидан Дональд Трамп НАТО давлатларини Эронга қарши урушда иштирок этишни истамаётгани учун кескин танқид қилди.