Суд собиқ президентни айбдор деб топди

Қирғизистоннинг Первомай туман суди собиқ президент Алмазбек Атамбоевни қонундаги ўғри Азиз Батукаевни ҳибсдан озод этишда сиртдан айбдор деб топди, бироқ иш бўйича даъво муддати ўтгани учун жазо тайинламади. Бу ҳақда ТАСС давлат раҳбарининг адвокати Сергей Слесаревга таяниб хабар берди. 

“Батукаевга нисбатан аллақачон ҳукм чиқарилган. Атамбоев даъво муддати ўтганлиги сабабли (иш бўйича – таҳр.) ҳукм чиқармасдан айбдор деб топилди”, дейди у. 

Суд Қирғизистоннинг собиқ раҳбари 2006 йилда 16 йилга озодликдан маҳрум этилган жиноятчи Батукаевнинг 2013 йил апрелида, жумладан, оммавий тартибсизликларни уюштирганлик ва ноқонуний қурол-яроғ сақлагани учун ноқонуний равишда муддатидан олдин озод қилинишига алоқадорлигини аниқлади. Муддатидан олдин озод этилганидан сўнг, Батукаев Грознийга жўнаб кетган. 

Атамбоевнинг ҳибсга олиниши

Қирғизистонга 2011-2017 йилларда раҳбарлик қилган Атамбоев 2019 йил 8 август куни Чуй вилоятининг Қўй-Тош қишлоғидаги қароргоҳида деярли бир кун давом этган махсус операция давомида қўлга олинган эди. Унга қўйилган барча айбловларни бир неча бор рад этган собиқ давлат раҳбарининг тарафдорлари қаршилик кўрсатган ва махсус бўлинманинг бир зобити операция давомида ҳалок бўлган. Тўқнашув вақтида 100 дан ортиқ одам, жумладан полициячилар тиббий ёрдам сўраб мурожаат қилган. 

Собиқ президент ҳибсга олинганидан бир неча кун ўтиб, ҳуқуқ-тартибот идоралари ходимларига нисбатан зўравонлик қўллаш, оммавий тартибсизликлар уюштириш, қотиллик, қотилликка уриниш, шунингдек, гаровга олишни ташкил этиш, Бишкек иссиқлик электр станциясини реконструкция қилишдаги коррупция, Бишкекдаги “Форум” саноат гуруҳи биноси билан ноқонуний битим тузиш, Қўй-Тош қишлоғи ва Иссиқкўл вилоятидаги ер участкаларини ноқонуний эгаллаб олиш айбловлари қўйилган. 

Собиқ давлат раҳбари 2020 йил ёзида 11 йилу 2 ойга қамоқ жазосига ҳукм қилинган эди. Кейинчалик Атамбоевга қўйилган баъзи айбловлар олиб ташланган, 2022 йил июнида эса у 2020 йил октябрь ойида Бишкекда оммавий тартибсизликлар уюштирганликда айбланиб, оқланган эди. 

Суд қарори билан 2023 йил 14 февралда 3,5 йил тартибли колонияда ўтирганидан сўнг озодликка чиқди ва республикани тарк этди. Собиқ президент озодликка чиққанидан кейин даволаниш учун Испанияга кетди. Ҳозирда ҳам у Қирғизистондан ташқарида.