Қирғизистонда дунёдаги энг узун шиша кўприк қурилади

Қирғизистоннинг “Ала-Арча” миллий боғида дунёдаги энг узун осма шиша кўприкни қуриш режалаштирилмоқда. Режага кўра, унинг узунлиги 732 метрни ташкил этади. Бу ҳақда миллий боғ маъмурияти хабар берди.

Қайд этилишича, Қирғизистон Президенти Иш бошқармаси лойиҳа эскизларини тақдим этган ва лойиҳани амалга ошириш билан шуғулланадиган Европа компанияси билан учрашув ўтказган. Идора маълумотларига кўра, шиша кўприкнинг узунлиги 732 метрни ташкил қилади.

Ишларни жорий ойда бошлаш режалаштирилган, лойиҳани якунлаш ва туристлар учун очиш эса 2027 йилнинг охирида амалга ошиши кўзда тутилган. Объектни Гиннесснинг рекордлар китобига киритиш режалаштирилмоқда. 

Кўприк катта сайёҳлик йўналишининг бир қисмига айланади. Унинг ёнида Тепши платосидан Теке-Тоо тоғи ва маҳаллий шаршарагача бўлган экологик сўқмоқ барпо этилади. Бундан ташқари, “Ала-Арча”да аллақачон осма дор йўли (канат йўли) ишга туширилган, дам олиш уйлари қурилган ва беш юлдузли меҳмонхона қурилиши якунланмоқда.

Маълумот учун, “Ала-Арча” – бу Қирғизистондаги сўлим баланд тоғ тизмаси ва Давлат табиат парки бўлиб, Бишкекдан тахминан 30-40 км жанубда, Қирғизистон тизмасининг шимолий ёнбағрида жойлашган. 1976 йилда ташкил этилган ушбу парк Қирғизистон табиатининг ташриф қоғози ҳамда пойтахт яқинидаги сайёҳлар, альпинистлар ва треккинг ишқибозларини ўзига тортувчи асосий марказ ҳисобланади.

Эслатиб ўтамиз, аввалроқ Дубайнинг “Dubai Gold District” савдо туманида жорий йил охиригача 24 каратли олтиндан тайёрланган пиёдалар йўлагини очиш режалаштирилаётгани ҳақида хабар берилган эди.