Суд собиқ бош вазирнинг қамоқхонада судланишига қарши чиқди

Исломобод Олий суди Покистоннинг собиқ бош вазири, мухолифатдаги “Адолат ҳаракати” (АҲ) партияси етакчиси Имрон Хон ва собиқ ташқи ишлар вазири ва АҲ раиси ўринбосари Шоҳ Маҳмуд Қурейши “Расмий сирлар тўғрисида”ги қонунни бузганликда айбланиб, қамоқхонада суд мажлисларини ўтказишни ноқонуний деб топди. 

“Исломобод Олий суди Адлия вазирлигининг Хон ва Қурейшини ушбу айблов бўйича улар сақланаётган қамоқхонада суд қилиш тўғрисидаги билдиришномасини ноқонуний деб топди”, деб ёзди сиёсатчиларнинг адвокати Наим Паньюта Х (собиқ Twitter) ижтимоий тармоғида. 

Унинг сўзларига кўра, Исломобод суди шу билан Имрон Хоннинг ўзи ва Қурейши қамоққа олинган Адиала қамоқхонаси ташқарисида очиқ суд жараёни ўтказиш ҳақидаги илтимосини қаноатлантирган. Аввалроқ Покистон Адлия вазирлиги хавфсизлик нуқтайи назаридан суд жараёнини қамоқхона ҳудудида ўтказишни буюрган эди. 

Хон ва Қурейши устидан суд жараёни Федерал тергов агентлигининг 1923 йилда қабул қилинган “Давлат сирлари тўғрисида”ги қонунни бузганлик, Ташқи ишлар вазирлигининг дипломатик кодексидан сиёсий мақсадларда фойдаланиш ва махфий ҳужжат мазмунини давлат хавфсизлиги манфаатларига зарар етказувчи шахсий манфаатлар учун рухсат этилмаган шахсларга ошкор қилишга асосланади. 

Имрон Хон 2022 йил 27 мартда Покистоннинг Вашингтондаги элчисидан кодланган телеграмма олганини очиқ эълон қилганидан кейин давлат сирларини ошкор қилганликда айбланган. Хоннинг сўзларига кўра, телеграммада АҚШ вакиллари дипломатик миссия раҳбари билан суҳбатда бош вазирни 2022 йил февралида Москвага сафари чоғида намойиш этган Украина бўйича россияпараст позицияси туфайли ҳокимиятдан четлатишни тавсия қилгани ёзилган.

Покистон Ташқи ишлар вазирлигининг АҚШ расмийларига Хонни ҳокимиятдан четлатиш ҳақидаги маслаҳатини тасдиқлаш ёки рад этиш ҳақидаги сўровига жавобан АҚШ Давлат департаменти америкалик сиёсатчиларнинг шахсий суҳбатларига изоҳ бермаслигини маълум қилган.

Хон 2022 йил 10 апрелда коррупция айбловлари туфайли унга ишончсизлик вотумидан сўнг ҳукумат раҳбари лавозимидан четлатилган. Кейинчалик Хон ҳужжат "йўқолган" деб даъво қилиб, терговчиларга шифрланган дипломатик кабелни тақдим эта олмаган.