Суд фақат Трамп фойдасига ишламоқда – “Reuters”

АҚШ етакчиси Дональд Трамп 2024 йил ноябрь ойида қайта сайланганидан сўнг, унинг адвокатлари Делавер штатидаги судга мурожаат қилиб, Президент учун фуқаролик ишлари тўхтатилишини талаб қилган. Шунга қарамай, Трампнинг сўнги ҳатти-ҳаракатлари даъво қилиш ҳуқуқида мувозанат бузилганини кўрсатмоқда. Бу ҳақда “Reuters” ёзди.

Манбага кўра, Трамп ўз иммунитетини четлаб ўтган ҳолда Иова штатидаги “Des Moines Register” газетаси ва бошқа бир нечта ташкилотларга қарши баъзи даъволарни киритгани жиддий мунозарага сабаб бўлган. Ишлар асосан туҳмат ва ноқонуний ҳаракатлар иддаоларига қаратилган бўлиб, китоб нашриёти ҳамда йирик медиа компанияларини ўз ичига олади.

Баъзи адвокатлар унинг бу позициясини ўзига қарши ишлатмоқчи. Уларнинг фикрича, агар Президент ўзига қарши очилган суд ишларида жавоб беришга “вақтим йўқ” деса, бошқаларга қарши ариза бериш ҳуқуқига эга бўлмаслиги керак. Иова судьяси ва Флорида апелляция суди бу сўровларни рад этган, аммо Трампнинг ўзи аризани бекор қилиш ҳуқуқига эга эканини маълум қилган. Экспертлар эса уни “доимий даъвочи” деб атаб, “Президент” лавозими рақибларига қарши кучли восита сифатида ишлашига имкон бераётганини урғулаган.

Эслатиб ўтамиз, аввалроқ Дональд Трамп Гренландияни эгаллаб олиш борасидаги кескин баёнотларидан кейин жиддий босим остида қолгани ҳақида хабар берилганди.

Мусулмон Содиқ