Стармернинг ўринбосари солиқ тўламагани учун истеъфога чиқди

Кеча, 5 сентябрь куни Буюк Британия Бош вазири Кир Стармернинг ўринбосари Анжела Рейнер солиқ тўловлари билан боғлиқ можаро туфайли истеъфога чиқди. У, шунингдек, ҳукмрон "Лейбористлар" партияси етакчисининг ўринбосари лавозимини ҳам тарк этади. Бу ҳақда “Sky News” хабар берди.

Қайд этилишича, Рейнер ҳукуматдан кетиш қарорини Sky News подкастида Англиянинг жанубидаги Ҳоув шаҳрида квартира сотиб олганда герб йиғимини (stamp duty) тўламаганини тан олганидан сўнг қабул қилган. У бунда битимни тузган юристларни айблаган. Рейнернинг сўзларига кўра, у солиқни тўлаш зарурлиги ҳақида огоҳлантирилмаган. The Guardian‘нинг ёзишича, Рейнер тахминан 40 минг фунт стерлинг солиқни тўламаган.

Кейинчалик Рейнер Британия Бош вазири Кир Стармер номига мактуб йўллаб, солиқ масаласида мутахассисдан қўшимча маслаҳат олмагани учун “чуқур афсусда” эканини билдирган.

“Мен бу хато учун тўлиқ жавобгарликни ўз зиммамга оламан. Мен ҳеч қачон белгиланган суммадан камини тўлашни ният қилмаганман”, деб ёзган у.

Стармер эса унга миннатдорчилик билдирган.

“Сизнинг бош вазир ўринбосари, давлат котиби ва Лейбористлар партияси етакчисининг ўринбосари сифатидаги фаолиятингиз шундай якунланганидан жуда афсусдаман”, деган у.

Маълумот учун, Анжела Рейнер 2024 йилнинг 5 июлида бош вазир ўринбосари этиб тайинланган. У тайинловдан олдин 2015 йилдан буён Эштон-андер-лайн ( Ashton-under-Lyne) округида Жамоат палатаси депутати бўлиб ишлаган.

Герб йиғими – Англия ва Шимолий Ирландияда кўчмас мулк ёки ер сотиб олишда олинадиган солиқ. Унинг ставкаси мулкнинг турига (яшаш, тижорат ёки аралаш мақсад) ҳамда харидорнинг резидентлиги ёки норезидентлигига қараб белгиланади.