Стармер истеъфога чиқишини эълон қилди

north_east

Жиловланмас Британия: Буюк Британия Бош вазири яна алмашиши мумкин

Бугун, 22 июнь куни Буюк Британия Бош вазири Кир Стармер истеъфога чиқишини эълон қилди. Бу ҳақда BBC хабар берди.

Қайд этилишича, эндиликда мамлакат ҳукуматини Катта Манчестернинг собиқ мэри Энди Бёрнем бошқариши мумкин. У ўтган ҳафтада Англиянинг шимоли-ғарбидаги Мейкерфилд округидан парламент депутати этиб сайланиш учун ўтказилган навбатдан ташқари сайловларда ишончли ғалабага эришган эди.

Лейбористлар партиясидаги кўпчилик Бёрнем ушбу сиёсий кучга Найжел Фаражнинг тобора оммалашиб бораётган ўнг-популистик “Reform UK” партияси таҳдидини енгиб ўтишда ёрдам беришига умид қилмоқда. Ижтиомий сўровномалар натижаларига кўра, “Reform UK” айни пайтда мамлакатдаги энг машҳур сиёсий куч бўлиб қолмоқда.

Шундай бўлса-да, Буюк Британияда умумий сайловлар кечи билан 2029 йилнинг августига қадар бўлиб ўтиши керак, шу сабабли лейбористлар ўша вақтгача сайловчиларнинг хайрихоҳлигини қайта қозонишга умид қилмоқда.

Стармер Лейбористлар партияси учун муваффақиятсиз якунланган 7 майдаги маҳаллий сайловлардан сўнг лавозимини тарк этмоқда. Ушбу сайловлар натижасида ҳам ҳукмрон лейбористлар, ҳам консерваторлар жиддий йўқотишларга учраб, овозларнинг катта қисмини “Reform UK” партиясига ва нисбатан камроқ қисмини Яшиллар партиясига бой берган.

Стармернинг истеъфоси Буюк Британияда сўнгги ўн йилдан сал кўпроқ вақт ичида еттинчи ҳукумат раҳбари иш бошлашини англатади.