СССР давридаги чегаралардан воз кечиш давлатчиликдан воз кечишдир – Пашинян

Арманистоннинг собиқ Совет Иттифоқи даврида мавжуд бўлган чегараларидан воз кечиш давлат суверенитети ва мустақилликдан воз кечиш билан тенг. Бу ҳақда Арманистон Бош вазири Никол Пашинян Facebook’даги саҳифасида ёзди.

“Очиғини айтишим керакки, бу ёндашув Арманистон учун жуда хавфли. Чунки СССР давридаги хариталардан воз кечиш давлатчилик ва мустақилликдан воз кечишни англатиши мумкин. Шу сабабли, биз Совет Арманистони ҳудудида мустақилликка эришдик ва халқаро ҳамжамият бизни халқаро миқёсда шундай деб тан олди. Тан олинган ҳудуд хавфсизлик учун муҳим ва биз учун буфердир”, дейди у.

Пашинянга кўра, агар Арманистон фуқароларининг ўзлари халқаро тан олинган ҳудудни тан олмаса, бошқаларга уни тан олмаслик имкониятини беради.

“Халқаро миқёсда тан олинган ҳудудимизни аниқ тан олмаган ҳолда, биз бошқаларга эшикларимизни очяпмиз”, дейди у.

Маълумот учун, Арманистонда мухолифат Никол Пашинянни собиқ Совет Иттифоқи давридаги хариталарни тан олиш ва давлат суверенитетини йўқотиш имкониятларини тилга олиш орқали Қорабоғни Озарбайжон таркибига киришини тан олиш қарорини оқлашга уринишда айблаб келмоқда.

Эслатиб ўтамиз, аввалроқ Никол Пашинян давлат телевидениесига берган интервьюсида Ереван ўзаро келишув асосида Бакуга қарши халқаро даъволардан воз кечишга тайёр эканини билдирган эди. Озарбайжон Ташқи ишлар вазири Жайҳун Байрамов эса Баку ва Ереван ўртасидаги муносабатларнинг нормаллашуви Арманистоннинг ўз Конституциясида Озарбайжонга нисбатан акс эттирилган ҳудудий даъволарни ўчиришига боғлиқ эканини айтганди.