Собиқ президентнинг қизи йигитларни Украинадаги урушга ёллашда айбланмоқда 

Жанубий Африканинг собиқ президенти Жейкоб Зуманинг қизи, парламент аъзоси Дудузиле Зума, Россия сафида Украинага қарши жанг қилаётган қўшинларга Жанубий Африка ва Ботсванадан эркакларни ёллашда иштирок этганликда айбланмоқда. Бу ҳақда “Bloomberg” хабар берди.

Қайд этилишича, тахминан 20 нафар йигит жорий йилнинг июль ойида Россияга юборилган. Уларга: “Тансоқчиликка тайёрланасиз”, деб ваъда берилган, бироқ улар рус тилида тузилган шартномаларни имзолагач, фронт чизиғига жўнатилган. 

Зума уларни фронтга юборилмасликка ишонтирган бўлса-да, Россияга жўнатилган йигитлар оилаларига, телефон ва банк карталари олиб қўйилгани ва улар уруш зонасига олиб кетилаётганини хабар берган. Август ойидан бери улар оилалари билан алоқа қилмаган.

Жанубий Африка ҳукумати Донбассда 17 нафар фуқароси борлигини тасдиқлади ва уларнинг қайтарилишини талаб қилди. Президент Сирил Рамафоса уларнинг қандай ёллангани бўйича тергов бошлашни буюрди. Африка қонунчилигига кўра, хорижда ёлланма аскар бўлиб хизмат қилиш жиноят ҳисобланади.

Эслатиб ўтамиз, олдинроқ Россия энди урушга борган мигрантларни депортация қилишни тўхтатмоқчилиги ҳақида хабар қилинганди. Москвада чет элликларни ўз мамлакатларида жавобгарликка тортилишдан ҳимоя қилувчи учта қонун лойиҳаси кўриб чиқилмоқда.

Комила Қобилова