Собиқ бош прокурор 80 ёшида вафот этди

Қирғизистоннинг собиқ бош прокурори, давлат арбоби ва III чақириқ Жогорку Кенеш депутати Қамбарали Қонғантиев кеча, 31 июль куни 80 ёшида вафот этди. Бу ҳақда “24.kg” хабар берди.

Қамбарали Қонғантиев 1947 йил 1 январда Жалолобод вилоятининг Майлуу-Суу шаҳрида туғилган. У 1974 йилда Қирғиз давлат университетининг юридик факультетини тамомлаган.

У меҳнат фаолиятининг катта қисмини прокуратура органларида ўтказган. Иссиқкўл вилояти прокуратураси катта терговчиси ва Пржевальск шаҳри прокуроридан тортиб Қирғиз ССР прокурорининг ўринбосари лавозимигача кўтарилган. Кейинчалик Бишкек прокуратурасида ҳам масъул вазифаларда ишлаган.

Конгантиев Қирғизистон молия полициясини ташкил этишда ҳам иштирок этган. Янги тузилган идорада тергов йўналишига раҳбарлик қилиб, иқтисодий ва молиявий жиноятларни тергов қилиш тизимини шакллантиришга ҳисса қўшган.

Узоқ йиллар Жогорку Кенеш аппаратида юридик бўлим мудири сифатида фаолият юритиб, қонун ижодкорлиги жараёнини ҳуқуқий жиҳатдан таъминлаш билан шуғулланган. 2005 йил март ойида III чақириқ Жогорку Кенеш депутати этиб сайланган Қонғантиев парламентда конституциявий қонунчилик, давлат тузилиши, қонунийлик, суд-ҳуқуқ ислоҳоти ва инсон ҳуқуқлари, шунингдек парламент ишини ташкил этиш, регламент ва депутатлик этикаси бўйича қўмиталарга раҳбарлик қилган.

2005 йил ноябридан 2007 йил мартигача Қирғизистон Бош прокурори лавозимида ишлаган. Кейинчалик президент ва ҳукуматнинг Жогорку Кенешдаги вакили, давлат раҳбарининг маслаҳатчиси ҳамда “Ота-Юрт” партияси сиёсий кенгаши аъзоси бўлган.

Маълум қилинишича, марҳум билан видолашув маросими эртага, 2 август куни соат 9:30 да Бош прокуратура биносида бўлиб ўтади. У “Ола-Арча” давлат тарихий-мемориал қабристонига дафн этилади.

Эслатиб ўтамиз, аввалроқ Қирғизистоннинг Меҳнат ва ижтимоий ривожланиш бўйича собиқ вазири Улуғбек Қўчқоров АҚШда курьерлик қилаётгани маълум бўлганди.