“Симба”ни қийнаган эркак 7 суткага қамалди

Тошкент шаҳрида маст ҳолатда қўшнисининг мушугини бўғиб, оёғини қайирган эркак 7 суткага қамалди. QALAMPIR.UZ суд ҳужжати билан танишди.

Ҳужжатга кўра, воқеа жорий йилнинг 28 октябрь куни Шайхонтоҳур туманидаги кўп қаватли уйларнинг бирида содир бўлган. Дўконда сотувчи бўлиб ишловчи 24 ёшли М. К. маст ҳолатда қўшнисининг “Симба” лақабли мушугини уйнинг кириш йўлагида кўриб қолган.

У мушук билан видео олмоқчи бўлганини, бироқ мастлиги сабабли унга жароҳат етказиб қўйганини айтган. Судда М. К. айбига иқрор бўлиб, қилган ишидан пушаймонлигини билдирган ва енгиллик беришни сўраган.

Суд ҳужжатларида келтирилишича, эркак мушукни бўғиб қийнаган ва унинг оёғини қайирган. Ветеринария клиникаси маълумотномасида ҳайвоннинг чап олд оёғида жароҳат борлиги қайд этилган. Ҳолат ИИБ ходимининг билдиргиси, аризачи ва гувоҳларнинг тушунтириш хатлари, видео материаллар ҳамда бошқа далиллар билан тасдиқланган.

Суд М. К. нинг ҳаракатларини Маъмурий жавобгарлик тўғрисидаги кодекснинг 111-моддаси 2-қисми ҳайвонларга нисбатан шафқатсиз муносабатда бўлиш деб баҳолаган. Унга 7 сутка маъмурий қамоқ жазоси тайинланган. Шунингдек, М. К. дан маъмурий қамоқда сақлаш билан боғлиқ харажатлар учун ҳар бир суткага 66 минг сўмдан, жами 462 минг сўм ундирилиши белгиланган.

Эслатиб ўтамиз, аввалроқ Андижонда кўпроқ кузатувчи йиғиш учун мушук боласини баланд тўсиқ орқали отган йигит жазолангани ҳақида хабар берилган эди.