Шольц Германия қачон Россия нефтига тобеликдан қутилиши мумкинлигини айтди

Германия жорий йилнинг ўзидаёқ Россиядан импорт қилинадиган кўмир ва нефтга тобеликдан мустақил бўлиши мумкин. Бу ҳақда Германия канцлери Олаф Шольц маълум қилди.

“Биз шу йил Россиянинг кўмир ва нефть импортидан (тобеликдан – таҳр) қутулишга ҳаракат қиламиз ва имкон қадар тезроқ газ импортидан мустақил бўлишимиз учун техник шартларни тайёрлаймиз”, деган у ARD телеканалига берган интервьюсида.

Аввалроқ Иқтисодиёт вазири Роберт Хабек Германия 2024 йилнинг ёзигача Россия газидан, 2022 йилнинг ёзида эса кўмир ва нефтдан воз кечиши мумкинлигини айтган эди.

Шольц, шунингдек, Европа Иттифоқи ҳозир Россиядан олинадиган энергия ресурслари таъминотига қарам эканлигини тан олган.

“Ҳақиқат шуки, агар шундай қилсак (агар Европа Иттифоқи давлатлари Россия энергия ресурсларидан воз кечса - таҳр.), биз жиддий иқтисодий инқирозни бошлаймиз. Шу сабабдан ўзимизни бу қарамликдан халос қилиш учун ҳамма нарсани қилдик. Менимча, бу тўғри йўл деб биламан”, деган Шольц.

Эслатиб ўтамиз, жорий йилнинг 23 март куни Россия Президенти Владимир Путин ҳукумат ва Россия Федерацияси Марказий банкига Россия газининг Европа давлатларига етказиб берилиши учун тўловларни рублга ўтказиш бўйича топшириқ берди. Бунга Ғарб давлатларининг Украинадаги уруш ортидан Москвага қарши жорий қилган санкциялари сабаб бўлди.

Шундан сўнг, Германия канцлери Олаф Шольц ҳам Германия газни рублда сотиб олмаслигини эълон қилди. Унинг ортидан Франция Президенти Эммануэль Макрон ҳам рус газини рублдан сотиб олмаслигини айтди.

Владимир Путин эса газни рублда сотиш бўйича қарорида собит қолмоқда. У Вазирлар Маҳкамаси, Россия банки ва “Газпром” компаниясига ой охиригача дўст бўлмаган мамлакатларга газ етказиб бериш учун тўлов валютасини рублга ўзгартириш ҳақидаги ҳисоботни тайёрлашни буюрди.