Ширинлик фожиаси: Мадинанинг жасади қабрдан қазиб олинди (видео)

Аввалроқ, Қозоғистоннинг Жамбил вилоятида 19 ёшли Ўзбекистон фуқароси Мадина ширинлик сабабли эри билан юзага келган жанжалдан сўнг вафот этгани ҳақида хабар берилган эди. Сирли ўлим ортидан унинг жасади қайта суд-тиббий экспертизасини ўтказиш учун эксгумация қилинди. Бу ҳақда маҳаллий журналист Жан Аҳмадиев хабар берди.

Қайд этилишича, жараён жорий йилнинг 4 ноябрь куни жабрланувчи томоннинг расмий илтимосномасига кўра ўтказилган. Марҳуманинг яқинлари дастлабки текширув хулосаларига узил-кесил рози эмасликларини билдирган.

Журналистнинг хабар қилишича, марҳуманинг оиласи экспертларнинг хулосаларига ишончсизлик билдиргани сабабли Олмаотада қайта комиссия экспертизаси тайинланишига эришган. Эксгумация полиция ходимлари ва соҳавий мутахассислар иштирокида бўлиб ўтган.

Жамбил вилояти Полиция департаменти Жиноят кодексининг 105-моддаси (ўзини ўзи ўлдириш даражасига етказиш) бўйича судгача бўлган тергов ҳали ҳам давом этаётганини тасдиқлаган. Марҳуманинг эри айни дамда иш бўйича ҳимояланиш ҳуқуқига эга гувоҳ мақомида қолмоқда.

Ширинлик фожиаси

Эслатиб ўтамиз, ҳодиса жорий йилнинг август ойида содир бўлган эди. Жамбил вилоятида 19 ёшли Ўзбекистон фуқароси Мадина ширинлик сабабли эри билан юзага келган жанжалдан сўнг вафот этган. Марҳуманинг дугонасининг айтишича, Мадина эри билан тез-тез келишмовчиликка бориб турган ва эркак унга нисбатан жисмоний куч ишлатгани ҳақида бир неча бор шикоят қилган. Унинг сўнгги жанжали саккиз ойлик фарзанди учун олиб келинган “Барни” бисквити туфайли юзага келган. Дугонасининг сўзларига кўра, эри боласи учун олиб келган бисквитдан Мадина 1 дона еган. Шундан кейин эркак қизни урган. Эртаси куни Мадина дугонасига йиғиб қўйган буюмларининг суратини юбориб, эри билан яшамаслигини билдирган ва кетмоқчи эканини айтган. Шунингдек, ундан 15 минг тенге сўраган. Бироқ керакли маблағ ўша пайтда топилмаган. Шундан сўнг, Мадина билан алоқа узилган. Кейинроқ унинг қайнонаси дугонасига қизнинг вафот этганини айтган. 

Маълум бўлишича, Мадина Ўзбекистон фуқароси, унинг эри эса Қозоғистон фуқароси бўлган. Улар турмуш қуриб, қарийб икки йил давомида бирга яшаган ва саккиз ойлик фарзандни тарбиялаган.