Шимолий Кореянинг илк разведка самолёти деярли тайёр экани айтилди (фото)

Шимолий Корея ўзининг биринчи ҳаводан огоҳлантирувчи самолётининг қурилишини якунлаш арафасида. Сунъий йўлдошдан олинган суратлар ҳам шуни кўрсатади. Бу ҳақда кеча, 4 март куни “38 North” тадқиқот сайти хабар берди.

Нашр 3 март куни Airbus компаниясининг Pleiades NEO сунъий йўлдош тизими томонидан олинган Пхеньяндаги Сунан аэропортининг сунъий йўлдош тасвирини эълон қилди. Суратда фюзеляжнинг юқори қисмига радар антенна пардаси ўрнатилган Ил-76 самолёти кўрсатилган.

Нашрнинг таъкидлашича, самолёт устида оқ учбурчак кўринади. Шунга ўхшаш учбурчакларни Хитойнинг баъзи радар разведка самолётларида кўриш мумкин. 

“Бу учбурчакнинг ўзи ишончли далил ҳисобланмаса ҳам, Хитойнинг қўллаб-қувватлаши ёки таъсирини кўрсатиши мумкин”, дея ёзган “38 North”.

Нашр Шимолий Кореянинг биринчи разведка самолётининг етиб келишини “бир неча йиллардан бери янги самолётлар олмаган ҳаво кучлари учун муҳим янгиланиш” деб атади.

north_east

Кимнинг синглиси АҚШга таҳдид қилди

Шимолий Корея ўзининг илк разведка самолётини Air Koryo юк рейсларида ишлатган Ил-76 самолётига асос солган. Самолёт 2023 йилнинг октябрь ойида техник хизмат кўрсатиш марказига етказилган, шундан сўнг юқори фюзеляж қайта ўрнатила бошланган. Нашрнинг ёзишича, ўшанда КХДР ҳаводан олдиндан огоҳлантирувчи самолёт яратаётгани ҳақида тахминлар бўлган, бироқ бу тасдиқланмаган.

Сеулдаги Корея Мудофаа тадқиқотлари форуми (Korea Defense Study Forum) таҳлил маркази раҳбари Чон Чан Укнинг “Associated Press”  агентлигига айтишича, разведка самолёти Шимолий Кореяга самолётлар ҳаракатини аниқлаш ва кузатиш, бошқа ҳарбий нишонларни аниқлаш ва маълумотларни қуруқликдаги марказларга узатишда ёрдам беради.

“Бу Шимолий Корея ҳаво кучлари кўзини очаётганга ўхшайди”, деди у.

Экспертнинг фикрича, КХДРга Жанубий Кореяни кеча-ю кундуз кузатиш учун камида тўртта разведка самолёти керак бўлади. Чон Чан Укнинг қўшимча қилишича, Жанубий Кореяда тўртта ҳаводан эрта огоҳлантириш ва назорат қилувчи самолёт бор ва мамлакат яна тўрттасини сотиб олишни режалаштирмоқда.

Шимолий Корея давлат оммавий ахборот воситалари разведка самолёти ишлаб чиқилиши ҳақидаги маълумотларни ошкор қилмаган.

Эслатиб ўтамиз, аввалроқ Шимолий Корея раҳбари Ким Чен Ин ядровий материаллар ишлаб чиқариш базаси ва ядровий қурол тадқиқот марказига ташрифи чоғида мамлакат ортиб бораётган ташқи таҳдидлар фонида ядровий қарама-қаршиликка тайёрлигини ошириши кераклигини айтганди.