Шавкат Мирзиёевнинг Қирғизистонга ташрифи якунланди

Бугун, 1 сентябрь куни Ўзбекистон Республикаси Президенти Шавкат Мирзиёевнинг Бишкек шаҳрига амалий ташрифи якунланди. Бу ҳақда Президент матбуот хизмати хабар берди. 

Қайд этилишича, Ўзбекистон етакчиси Шанхай ҳамкорлик ташкилотига аъзо давлатлар раҳбарлари кенгашининг юбилей йиғилишида иштирок этгани ташрифнинг асосий воқеаси бўлган. Унда ШҲТнинг 25 йиллик тараққиёт йўли сарҳисоб қилиниб, ўзаро ҳамкорликни янада ривожлантиришнинг устувор йўналишлари кўриб чиқилган.

Президент саноат кооперациясини чуқурлаштириш, транспорт алоқалари, рақамли технологиялар ва сунъий интеллектни ривожлантириш, озиқ-овқат, сув ва энергетика хавфсизлигини мустаҳкамлаш бўйича қатор ташаббусларни илгари сурган. Йиғилиш якунлари бўйича Бишкек декларацияси ҳамда асосий йўналишларда ҳамкорликни кенгайтиришга қаратилган муҳим ҳужжатлар тўплами қабул қилинган.

Шунингдек, Ўзбекистон етакчиси БМТнинг адолатли кўп қутбли дунё тартиботини шакллантиришдаги ролига бағишланган “ШҲТ плюс” форматидаги учрашувда нутқ сўзлаган. Бирлашган Миллатлар Ташкилотининг марказий ва мувофиқлаштирувчи ролини сақлаб қолиш зарурлигини таъкидлаб, “ШҲТ плюс”ни минтақалараро мулоқот майдони сифатида ривожлантиришни таклиф қилган.

Саммит доирасида Хитой Халқ Республикаси Раиси Си Цзиньпин, Россия Президенти Владимир Путин ва Покистон Бош вазири Шаҳбоз Шариф билан музокаралар бўлиб ўтган. Шунингдек, БМТ Бош котиби Антониу Гутерриш ва АҚШ Президентининг Жанубий ва Марказий Осиё бўйича махсус вакили Сержио Гор билан учрашувлар ўтказилган.

Бишкекда давлат раҳбари рафиқаси билан бирга VI Бутунжаҳон кўчманчилар ўйинларининг тантанали очилиш маросимида иштирок этган.

Тадбирлар якунлангач, “Манас” халқаро аэропортида Ўзбекистон Президенти ва рафиқасини Қирғиз Республикаси Вазирлар Маҳкамаси раиси – Президент Администрацияси раҳбари Одилбек Қосималиев ва бошқа расмийлар кузатиб қўйган.

Давлат раҳбари Тошкент шаҳрига қайтиб келган.