Шавкат Мирзиёев Жанубий Корея Бош вазирининг ўринбосарини қабул қилди

Бугун, 7 сентябрь куни Шавкат Мирзиёев Корея Республикаси Бош вазирининг ўринбосари, иқтисодиёт ва молия вазири Чху Гён Хо бошчилигидаги делегацияни қабул қилди. Бу ҳақда Президент матбуот хизмати хабар берди. 

Маълум қилинишича, учрашув аввалида Бош вазир ўринбосари Чху Гён Хо Шавкат Мирзиёевга Корея Республикаси Президенти Юн Сок Ёлнинг саломини етказган. Шундан сўнг, Ўзбекистон билан Жанубий Корея ўртасидаги алоҳида стратегик шериклик муносабатларини янада мустаҳкамлаш ва кўп қиррали ҳамкорликни кенгайтириш масалалари кўриб чиқилган. 

Қабул давомида Ўзбекистон Президенти Жанубий Корея билан кенг кўламли ҳамкорликнинг янги иқтисодий кун тартибини шакллантириш масалаларига тўхталган. Хусусан, кейинги йилларда ўзаро савдо ва инвестиция кўрсаткичлари барқарор ошгани, ўтган 2022 йилда товар айирбошлаш 24 фоизга кўпайгани, мамлакатда мингга яқин қўшма корхона фаолият юритаётгани ҳамда Кореядан инвестициялар ҳажми 7 миллиард доллардан ошгани қайд этилган.

Корея халқаро ҳамкорлик агентлиги, Корея Эксимбанки ва унинг фондлари билан кўп йиллар давомида самарали ҳамкорлик қилинаётгани, улар билан биргаликдаги лойиҳаларнинг умумий портфели 3 миллиард доллардан ошгани юқори баҳоланган. Муваффақиятли амалга оширилган қўшма лойиҳалар қаторида кўп тармоқли болалар шифохонаси, тўқимачилик технопарки, қишлоқ хўжалиги машинасозлиги ва нодир металлар бўйича марказлар борлиги таъкидланган.

Шунингдек, Жанубий Кореянинг етакчи компаниялари билан технологик ва инвестициявий шерикликни кенгайтириш, таълим ва соғлиқни сақлаш соҳаларидаги ижтимоий аҳамиятга эга лойиҳаларни жадаллаштириш, инфратузилма, “яшил” энергетика, давлат бошқаруви, молия, рақамлаштириш ва кадрлар тайёрлаш борасидаги қўшма лойиҳаларни илгари суриш амалий ҳамкорликнинг устувор йўналишлари сифатида кўрсатиб ўтилган. 

Учрашув якунида эса икки мамлакат ҳудудлари ўртасида самарали мулоқотларни йўлга қўйиш ва маданий-гуманитар алмашинувни фаоллаштириш учун кенг имкониятлар борлиги кўрсатиб ўтилган.