Шавкат Мирзиёев эртага Қозоғистонга боради

Ўзбекистон Республикаси Президенти Қозоғистон Республикаси Президенти Қосим-Жомарт Тўқаевнинг таклифига биноан эртага, 29 май куни амалий ташриф билан Остона шаҳрида бўлади. Бу ҳақда Ўзбекистон етакчисининг матбуот хизмати хабар берди.

Қайд этилишича, мамлакат етакчиси Олий Евроосиё иқтисодий кенгашининг навбатдаги йиғилиши тадбирларида кузатувчи давлат раҳбари мақомида иштирок этади.

Саммит кун тартибидан ташкилот доирасидаги кўп томонлама ҳамкорликни янада кенгайтириш масалалари ўрин олган. Амалий шерикликнинг устувор йўналишлари кўриб чиқилади.

Маълумот учун, Олий Евроосиё иқтисодий кенгаши — Евроосиё иқтисодий иттифоқининг (ЕОИИ) энг юқори органи бўлиб, унинг таркибига ташкилотга аъзо давлатлар (Россия, Беларусь, Қозоғистон, Қирғизистон ва Арманистон) Президентлари киради. Кузатувчи мақомига эга бўлган Ўзбекистон номидан ҳам Кенгаш йиғилишларида мамлакат Президенти иштирок этади. Ушбу кенгаш иттифоқнинг стратегик ривожланиш йўналишларини белгилайди, бюджетни тасдиқлайди ва ижроия органлар раҳбарларини тайинлайди. Кенгаш мажлислари йилига камида бир марта ўтказилиб, унда барча қарорлар консенсус (умумий розилик) асосида, яъни ҳар бир аъзо давлатнинг тенг овоз ҳуқуқи инобатга олинган ҳолда қабул қилинади.

Эслатиб ўтамиз, жорий йил май ойининг ўрталарида ҳам Шавкат Мирзиёев Қозоғистонга амалий ташриф билан борган эди. Ўшанда Ўзбекистон етакчиси Туркий давлатлар ташкилотининг норасмий саммитида иштирок этиб, унда муҳим ташаббусларни илгари сурган, ташкилот доирасида амалий ҳамкорликни кенгайтиришнинг устувор йўналишларини кўрсатиб ўтганди.