Салоҳ “Ливерпуль” таркибига қайтди

Муҳаммад Салоҳ  Премьер-лига доирасида “Ливерпуль”нинг “Брайтон”га қарши “Энфилд”да бўлиб ўтадиган учрашуви учун жамоа қайдномасига киритилди. Бу ҳақда “Sky Sports” нашри хабар берди.

Манбага кўра, бу қарор бош мураббий Арне Слот билан келишилган. Мураббий клуб манфаатларини устувор деб билишини ва Салоҳни майдонга тушириш ёки туширмаслик бўйича якуний қарорни ўзи қабул қилишини таъкидлаган.

Слот 12 декабрь куни эрталаб мисрлик ҳужумчи билан суҳбатлашишини айтган. Бунгача Салоҳ Чемпионлар лигаси доирасида “Интер”га қарши ўйинга олиб кетилмаган ва Премьер-лигадаги “Ливерпуль”нинг сўнгги 3 та учрашувида захирада қолдирилган эди.

“Мен бугун эрталаб Салоҳ билан гаплашаман. Бу суҳбат эртага вазият қандай бўлишини белгилайди. Кейинги сафар Салоҳ ҳақида гапирадиган бўлсам, буни бу ерда эмас, унинг ўзи билан қилганим маъқул. Бу мавзуда бошқа изоҳ бериш қийин”,  дейди Слот ўйинолди матбуот анжуманида.

Слот шунингдек, жорий йилнинг 3 декабрь куни “Сандерленд”га қарши ўйиндан (1:1) сўнг Салоҳ, унинг вакиллари ва клуб раҳбарияти ўртасида бир нечта суҳбатлар бўлиб ўтганини тасдиқлади.

Маълумот учун, “Ливерпуль” ва “Брайтон” учрашуви бугун, 13 декабрь куни Тошкент вақти билан соат 20:00 да бошланади.

Эслатиб ўтамиз, Муҳаммад Салоҳнинг “Ливерпуль” билан бўлаётган вазиятлар фонида Саудия Арабистони жамоалари мисрлик футболчини ўз сафига қўшиб олишга ҳаракат қилаётган эди.