Саида Мирзиёева АҚШ элчиси билан учрашди

Бугун, 12 февраль куни Ўзбекистон Президенти Шавкат Мирзиёевнинг тўнғич қизи – Президент ёрдамчиси Саида Мирзиёева АҚШнинг Ўзбекистондаги элчиси Жонатан Хеник билан учрашув ўтказди. Бу ҳақда у ўзининг Telegram-каналида маълум қилди.

Билдирилишича, суҳбатда тез ўзгараётган воқеликларни инобатга олган ҳолда АҚШнинг янги маъмурияти билан ўзаро манфаатли ҳамкорликни ривожлантириш масалалари муҳокама қилинган.

Қайд этиш жоиз, Ўзбекистон Президенти Шавкат Мирзиёев 2024 йил 6 ноябрь куни Дональд Трампга президент сайловида ғалаба қозониб, ушбу лавозимга сайлангани муносабати билан йўллаган табригида ҳамда ушбу лавозимга расмий киришгани муносабати билан 21 январда йўллаган табригида уни Ўзбекистонга ташриф билан келишга таклиф қилганди.

“Шунингдек, аёллар учун имкониятлар яратиш, таълим соҳасини яхшилаш ҳамда икки томонлама савдо-иқтисодий алоқаларни мустаҳкамлаш юзасидан фикр алмашдик”, деб ёзди Мирзиёева.

Эслатиб ўтамиз, аввалроқ Саида Мирзиёева Европа Иттифоқининг Ўзбекистон Республикасидаги элчиси Тойво Клаар билан учрашган эди. Учрашув давомида жорий йилнинг апрель ойида Самарқандда бўлиб ўтадиган “Европа Иттифоқи – Марказий Осиё” саммитига кўрилаётган икки томонлама тайёргарлик масалалари муҳокама қилинган.