“Сабр косам тўлмоқда”. Трамп Россияга оғир санкциялар билан таҳдид қилди

АҚШ Президенти Дональд Трамп Россияга жуда қаттиқ санкциялар қўллаш билан таҳдид қилди. Бу ҳақда у “Fox News” телеканалига берган интервьюсида сўз очди.

Америка Президентининг иддао қилишича, у урушлардан жуда чарчаган ва шу билан бирга, Россия раҳбари Владимир Путинга нисбатан “сабр косаси тўлиб бормоқда”. 

Оқ уй раҳбари эҳтимолий чора сифатида банклар, нефтга қарши санкциялар ҳамда божларни тилга олган. Трамп Ҳиндистоннинг Россия нефтини харид қилгани учун бу давлат импортига қўшимча 50 фоизлик бож жорий этганини эслатиб ўтган. 

“Путин можарони ҳал қилишни хоҳласа, Зеленский хоҳламади. Зеленский хоҳласа, Путин хоҳламади. Энди Зеленский хоҳлаяпти, Путиннинг жавоби эса сўроқ остида”, деган Трамп. 

АҚШ Савдо вазири Говард Лютникнинг сўзларига кўра, Ҳиндистон билан савдо келишуви учун асосий талаб Россия нефтидан воз кечишдир. Унинг тушунтиришича, Нью-Деҳли Россия нефтини 7–10 доллар арзонроқ нархда олиб, уни қайта ишлайди ва бутун дунёга сотади.

Москва доимгидек барча санкцияларни ноқонуний деб ҳисоблаб, уларни бекор қилишни талаб қилиб келмоқда. 

Шу нуқтада Путин ва Зеленскийнинг учрашуви борган сари мавҳумлик остида қолмоқда. Мамлакат етакчилари бир-бирига тўғри келмайдиган шартларни ўртага ташламоқда. Россия раҳбари Владимир Путин 3 сентябрь куни Хитойга тўрт кунлик сафари якунида Украина раҳбари Владимир Зеленский билан Москвада учрашишга тайёрлигини билдирганди. Унинг сўзларига кўра, Зеленский рози бўлса, музокаралар Москвада ўтказилиши мумкин. Шу билан бирга, у бундай ташаббус АҚШ Президенти Дональд Трамп томонидан илгари сурилганини ҳам қайд этган. Аммо кутилганидек, бу таклиф Украина томонидан кескин рад этилди. Украина Ташқи ишлар вазири Андрей Сибига Х тармоғидаги саҳифасида Путиннинг музокара ўтказиш учун Москвага чорловини қабул қилиб бўлмайдиган таклиф, дея атаган. Зеленскийнинг ўзи ҳам Путиннинг таклифини “амалга ошириб бўлмайдиган” иш дея баҳолаган ва рад этган.

Эслатиб ўтамиз, аввалроқ Трамп Россия учувчисиз самолётларининг Польша ҳаво ҳудудига бостириб киришини қоралар экан, бу беихтиёр, хато туфайли содир бўлган бўлиши мумкинлигини айтган ва нима бўлганда ҳам у бу ишлар, умуман, уруш давом этаётганидан рози эмаслигини билдирганди.