Россиянинг Украинага босқини ўзини оқлаши мумкин, агар... – Алишер Қодиров

Олий Мажлис Қонунчилик палатаси депутати, “Миллий тикланиш” демократик партияси фракциясининг раҳбари Алишер Қодиров Россиянинг Украинага тажовузкор босқинчилиги ўзини оқлаши ҳам мумкинлигини айтди. Бу ҳақда у ўзининг Telegram саҳифасида пост жойлади.

Унинг сўзларига кўра, Россиянинг Украинага тажовузкор босқинчилиги Евроосиёни АҚШдан узиб олиш ва қитъани зўравонликлардан ҳоли, тенгликка таянган коллектив келишувлар асосида биргаликда тараққиёт йўлига олиб келса, ўзини оқлаши ҳам мумкин.

north_east

Дунё сиёсатчилари кимни қўлламоқда – Трамп ёки Зеленский?

“Лекин, нео-империализм, АҚШни Украинага таклиф қилганидек: “рухсат берилган даражада эркинлик ва ерости бойликлари ҳисобига тинчлик” муносабатларига олиб келса, инсониятни жуда қуюқ қора кунлар кутиб турибди”, дея давом этган Қодиров.

Фракция раҳбари, шунингдек, америкалик сиёсатшунос, АҚШнинг 39-президенти Жимми Картернинг миллий хавфсизлик бўйича маслаҳатчиси бўлган Збигнев Бжезинскийнинг қаламига мансуб “Буюк шахмат доскаси” китобидан парчани ҳам келтириб ўтган.

“АҚШ ҳеч қачон Евросиё қитъасида ҳал қилувчи сўз соҳиби бўлмаган, Иккинчи жаҳон урушидан кейин пайдо бўлган бу имконият ақл билан фойдаланилса, АҚШни дунёнинг тараққиёт локомотивига айлантиради”, дейилган китобдан олинган парчада.

Қодиров АҚШ Президенти Дональд Трампнинг Европа Иттифоқи товарларига бож жорий қилиш ваъдасини шарҳлаган Франция Президенти Макрон, Европа “бахтли вассаллик” ҳолатидан чиқиб кетиш кераклигини таъкидлаганини ҳам эслатган.

“АҚШга бизни жавобимиз бунга бизни қарши эканлигимизни билдириб қўйиши керак. Биз таваккал қилиш, иштиёқ ва куч таъмини қайтаришимиз зарур”, деган Франция раҳбари.