Россиялик генерал машинасида портлатиб юборилди (видео)

Бугун, 22 декабрь тонгида Россия пойтахти Москва шаҳридаги Ясеневая кўчасида автомобиль портлаб кетди. Оқибатда машина ичида қамалиб қолган генерал-лейтенант Фанил Сарваров ҳалок бўлди. Бу ҳақда ҳуқуқни муҳофаза қилувчи органлардаги икки манбага таяниб, РБК хабар берди.

Нашрнинг ёзишича, тергов қўмитаси қотиллик ҳолати бўйича жиноят иши қўзғатган. Иш Жиноят кодексининг 105-моддаси 2-қисми “е” банди (жамоат учун хавфли усулда содир этилган қотиллик) ва 222.1-моддаси (портловчи моддаларни ноқонуний муомалага киритиш) бўйича очилган. Биринчи модда бўйича умрбод озодликдан маҳрум этиш жазоси, иккинчиси бўйича эса 20 йилгача қамоқ жазоси белгиланиши мумкин.

Тергов қўмитаси жиноят Украина махсус хизматлари томонидан уюштирилган бўлиши мумкинлигини тахмин қилмоқда. Тергов жараёни идоранинг марказий аппарати назоратига олинган.

Тергов версиясига кўра, портлаган автомобиль (РБК манбасига кўра, бу Kia Sorento бўлган) тагига портловчи қурилма ўрнатилган ва у масофадан туриб ишга туширилган. Ҳуқуқни муҳофаза қилувчи органлардаги РБКнинг икки манбасига кўра, портловчи қурилманинг қуввати тротил эквивалентида тахминан 300 граммни ташкил этган.

SHOT Telegram-канали хабарига кўра, 56 ёшли марҳумда кўплаб жароҳатлар, ёпиқ синишлар, оёқ жароҳатлари ва юз суяги синиши аниқланган.

Маълумот учун, Сарваров 2024 йил май ҳолатига кўра Россия Қуролли кучлари Оператив тайёргарлик бошқармаси бошлиғи лавозимида ишлаган. Ўша вақтда Президент фармони билан унга генерал-лейтенант ҳарбий унвони берилган.

Сарваров 1969 йил 11 мартда Перм ўлкасининг Гремячинск шаҳрида туғилган. 1990 йилда Қозон олий танк қўмондонлик билим юртини тамомлаган. Кейинчалик маршал Р.Я. Малиновский номидаги Бронетанк қўшинлари ҳарбий академияси ва Қуролли кучлар Бош штаби ҳарбий академиясини битирган. У барча асосий ҳарбий лавозимлардан ўтган. 1992-2003 йилларда Осетин–Ингуш можароси ва Чеченистондаги контртеррористик операцияда иштирок этган. Кейинчалик Қуролли кучлар Бош штабининг Асосий оператив бошқармаси ва Қуролли кучлар Оператив тайёргарлик бошқармасида хизмат қилган. 2015-2016 йилларда Суриядаги операцияни ташкил этиш ва ўтказишда қатнашган.

2016 йилда Қуролли кучлар Оператив тайёргарлик бошқармаси бошлиғи этиб тайинланган.

Эслатиб ўтамиз, аввалроқ Москванинг Рязанский туманидаги тураржой биносига киравериши ёнидаги портлашда Россия Қуролли кучларининг Радиация, кимёвий ва биологик ҳимоя қўшинлари бошлиғи генерал-лейтенант Игорь Кириллов ва унинг ҳайдовчиси ҳалок бўлгани хабар қилинганди. Кейинроқ Украина Игорь Кириллов ва ёрдамчисининг ўлдирилишида бевосита алоқадор экани маълум бўлди.