Россиядаги ўзбеклар жамияти раҳбари қамалди

Москва вилояти Ступино шаҳар суди ўзбеклар жамияти раҳбари Усмон Баратовни нафрат ва адоват қўзғатишда (Россия Федерацияси Жиноят кодексининг 282-моддаси 2-қисми) айбдор деб топиб, тўрт йилга умумий режимли колонияга ҳукм қилди. Бу ҳақда “Сотависион” хабар берди.

Баратовнинг ўзи ҳукмни “рус Фемидаси учун шармандалик” деб атади.

“Бу суднинг алоҳида суд тармоғи эмаслигини, суд ижро ҳокимиятининг хизматкори эканлигини кўрсатди. Суд ҳокимиятнинг алоҳида тармоғи эмас, хизматкори”,  деган у.

Баратовга нисбатан жиноий иш 2024 йилнинг январида очилган. Тергов маълумотларига кўра, 2023 йил декабрь ойида Баратов ва “бошқа шахслар” ижтимоий тармоқларда “Россия Федерацияси фуқаролари, жумладан, ҳарбий амалиётлар иштирокчиларининг қадр-қимматини камситувчи” постни эълон қилди. Гап Баратовнинг Одноклассникидаги пости ҳақида кетмоқда. У тухум нархининг ошиши ҳақидаги хабарни товуқлар сурати ва “Сизга тухум эмас, сариёғ бўлсин! Фронтдан хўрозларни олиб келинглар”, деган ёзувни жойлаган. 

Россия Федерацияси Тергов қўмитаси раҳбари Александр Бастрикиннинг таъкидлашича, россиялик “ҳарбий мухбирлар” унга Баратовнинг лавозими устидан шикоят билан мурожаат қилган. Баратовнинг ўзи унинг ёрдамчиси бир ой давомида “товуқларнинг сатирик фотосуратини” ижтимоий тармоқдан олиб ташламаганидан афсусда эканини, бу уни айблаётган “махсус ҳарбий операция” иштирокчиларини ҳақоратлашга ҳеч қандай алоқаси йўқлигини билдирди.