Россияда ўзбекистонлик мигрант кар-соқов эркакни уриб ўлдирди (видео)

Москва вилоятининг Шёлково шаҳрида Ўзбекистон фуқароси 49 ёшли кар-соқов эркакни калтаклаб ўлдирди. Бу ҳақда РБК хабар берди.

Маълум қилинишича, воқеа 20 июль куни содир бўлган. Тергов маълумотларига кўра, жабрланувчи ахлат контейнерлари ёнидан ўтаётганида, у ерда маҳаллий бошқарув компаниясида ишловчи икки ўзбекистонлик ишчи чиқиндиларни ковлаётган бўлган. Кар-соқов эркак имо-ишоралар орқали норозилигини билдирган – тахмин қилинишича, у уларнинг ахлатни титкилаётганига эътироз билдирган. Бироқ мигрантларнинг айтишича, улар унинг имо-ишораларини тажовуз сифатида тушунган.

Ишчилардан бири спиртли ичимлик таъсирида бўлган ҳолда, эркакнинг икки марта қорнига ва бир марта бошига зарба берган. Ҳужумга учраган эркак эса унга қарши ҳеч қандай қаршилик кўрсатмаган. Жабрланувчи йиқилиб, ерга қаттиқ урилган. Шундан сўнг, ҳужум қилганлар жиноят изларини яширишга ҳаракат қилган – улар жабрланувчининг жасадини буталарга тортиб олиб бориб, воқеа жойидан қочиб кетган. 
Шу билан бирга, жабрланувчининг телефони ва шахсий буюмларига тегилмаган, бу ҳолат воқеани ўғирлик билан боғлиқ эмаслигини кўрсатади.

Терговчилар кузатув камералари ёрдамида гумонланувчининг шахсини аниқлаш ва воқеа тафсилотларини тўлиқ тиклашга муваффақ бўлган. 

Кейинчалик аниқланишича, айбланувчи – 26 ёшли Ўзбекистон фуқароси Россия ҳудудида ноқонуний тарзда бўлган. Ҳозирда у ҳибсга олинган ва унга нисбатан “одамга қасддан оғир тан жароҳати етказиш, эҳтиётсизлик оқибатида унинг ўлимига сабаб бўлиш” моддаси бўйича айблов қўйилган.

Тергов давомида муҳожирнинг Россияда ноқонуний яшашига ва бошқарув компаниясида ишга жойлашишига кимлар ёрдам берганини аниқлаш ҳам кўзда тутилган. Суриштирув ишлари давом этмоқда.

Эслатиб ўтамиз, аввалроқ Россияда яшаш учун рухсатномаси бекор қилинган 29 ёшли Ўзбекистон фуқароси расмий равишда у ердан депортация қилинганди.