Россия Украинанинг энергетика объектларига йирик ҳужум уюштирди

Бугун, 28 ноябрь куни Россиянинг муҳим энергетика инфратузилма объектларини нишонга олган кенг миқёсли ҳаво ҳужумидан сўнг Украинада миллиондан ортиқ хонадонлар электрсиз қолди. Бу хақда CNN хабар берди.

Украина Энергетика вазирлиги маълумотларига кўра, бу жорий йилнинг ўзида Россиянинг Украина энергия таъминотига 11-кенг кўламли ҳужуми бўлиб, у бутун мамлакат бўйлаб электр токининг узилишига сабаб бўлган. 

“Энергетика яна душманнинг оммавий зарбаси остида қолди. Энергия объектларига ҳужумлар бутун Украина бўйлаб содир бўлмоқда. “Укрэнерго” узатиш тизими оператори зудлик билан электр энергиясини фавқулодда ўчирган. Хавфсизлик билан боғлиқ вазият яхшилангач, оқибатлар аниқланади”, деб ёзди Украина Энергетика вазири Герман Галушенко Facebook'даги саҳифасида.  

Украинанинг энергетика оператори кўплаб ҳудудларда фавқулодда электр таъминотини тўхтатди, ғарбий Львов, Волинь ва Ровно вилоятларида катта узилишлар содир бўлган. Камида беш киши, жумладан, марказий Винница вилоятида бир киши, жанубий Одесса вилоятида икки киши ва пойтахт Киевда икки киши жароҳатланган.

“Мамлакат бўйлаб, жумладан, Киевда ҳаво ҳужумидан мудофаа кучлари ишга туширилди”, деди пойтахт мэри Виталий Кличко. 

Тўққиз соатдан ортиқ давом этган ҳаво ҳужуми оқибатида шаҳар аҳолиси метро бекатларидан бошпана топди. Ҳукумат маълумотларига кўра, у ерда қурбонлар ҳақида ҳозирча маълумотлар йўқ.

Украина Президенти Владимир Зеленскийнинг сўзларига кўра, ҳужумда 100 га яқин дрон ва 90 дан ортиқ ракеталар иштирок этган.

“Бундай ҳар бир ҳужум ҳозир Украинага ҳаво ҳужумидан мудофаа тизимлари зарурлигини исботлайди, бу ерда улар базаларни эмас, балки ҳаётни сақлаб қолади”, дея қўшимча қилган  Зеленский. 

Бу билан у иттифоқчиларни Украинанинг ҳаво ҳужумидан мудофаа салоҳиятини оширишда ёрдам беришга чақирди.

Эслатиб ўтамиз, кеча, 27 ноябрь куни Россиянинг дрон ҳужуми оқибатида Запорожье вилоятида электр узатиш линияси шикастланган, бу эса бутун минтақада электр таъминотида узилишга олиб келганди.

Диёржон Қувондиқов