Россия Украинага 1-2 кунлик сулҳ таклиф қилди

Россия томони Украина билан музокараларнинг тўртинчи раунди бўлиб ўтишига умид қилмоқда. Бу ҳақда Россия делегацияси раҳбари Владимир Мединский кеча, 23 июль куни Истанбулда Россия Федерацияси ва Украина делегациялари ўртасидаги тинчлик музокараларининг учинчи раунди якунлари бўйича ўтказилган матбуот анжуманида маълум қилди.

Мединскийнинг айтишича, Россия Украинага ярадорлар ва ҳалок бўлган аскарларнинг жасадларини жанг майдонидан олиб чиқиш учун 24-48 соатлик қисқа муддатли сулҳ эълон қилиш масаласини кўриб чиқишни таклиф қилган.

Унинг сўзларига кўра, Россия томони Украинага 7 мингдан ортиқ ҳалок бўлган украиналик ҳарбий хизматчиларнинг жасадларини топширган, россиялик аскарларникини қайтариб олган. Мединскийнинг қўшимча қилишича, Россия Украинага яна 3000 ўлган украиналик аскарнинг жасадини топширишни таклиф қилган.

Бундан ташқари, Россия Президентининг махсус вакили ҳар томондан яна 1200 нафар маҳбусни алмашиш бўйича келишувга эришилганини айтди.

Делегация раҳбарининг қўшимча қилишича, Истанбулдаги музокаралар чоғида Россия ва Украина делегациялари Украинадаги урушни тартибга солиш бўйича меморандумлар лойиҳасида кўрсатилган томонлар позицияларини кенг муҳокама қилган.

Мединскийнинг қайд этишича, позициялар бир-биридан анча узоқда, бироқ томонлар алоқани давом эттиришга келишиб олган.

“Табиийки, биз ўтган сафар тақдим этилган меморандумларда томонларимиз белгилаган позицияларни узоқ вақт муҳокама қилдик”, деди у журналистларга.

Россия делегацияси раҳбари Россия Президенти Путин ва Украина етакчиси Владимир Зеленскийнинг учрашуви шартларини ҳам айтиб ўтди. Унинг сўзларига кўра, Россия Украинага Путин ва Зеленский ўртасидаги учрашув яхши ишлаб чиқилган бўлиши кераклигини етказган.

“Бундай учрашув бўлиши учун аввало келишув шартларини ишлаб чиқиш ва бу учрашувда нимани муҳокама қилиш кераклигини тушуниш керак, лекин аслида бу йиғилишда келишувни муҳокама қилиш эмас, балки унга чек қўйиш, имзо қўйиш керак”, деди у.

Маълумот учун, кеча, 23 июль куни Истанбулдаги Чироғон қароргоҳида Россия ва Украина делегациялари ўртасида тўғридан тўғри тинчлик музокараларининг учинчи раунди бўлиб ўтди. Музокаралар Туркия воситачилигида уюштирилди. Россия делегациясига Россия Президенти ёрдамчиси Владимир Мединский, Украина делегациясига эса Миллий хавфсизлик ва мудофаа кенгаши раҳбари Рустам Умаров бошчилик қилди. Музокаралар бошланишидан аввал Россия ва Украина делегациялари раҳбарларининг яккама-якка учрашуви бўлиб ўтди.
Москва ва Киев ўртасидаги олдинги икки музокара раунди 16 май ва 2 июнь кунлари Истанбулда ўтказилган. Учрашувлар якунида томонлар ҳарбий асирлар ва ҳарбий хизматчиларнинг жасадларини алмашиш, шунингдек, ўт очишни тўхтатиш шартлари баён этилган меморандум матнларини бир-бирига топширишга келишиб олган эди.

Эслатиб ўтамиз, кеча, 23 июль куни Истанбулда Россия Федерацияси билан тинчлик музокараларида қатнашган Украина делегацияси раҳбари Рустам Умаров учрашув якунлари бўйича ўтказилган матбуот анжуманида Киев Россия томонига Россия Президенти Владимир Путин ва Украина Президенти Владимир Зеленский ўртасидаги учрашувни август ойи охиригача ўтказишни таклиф қилганини айтганди. Россия Президенти матбуот котиби Дмитрий Песков эса бугун, 24 июль куни Россия ва Украина ўртасидаги музокаралар мазмунли бўлиши кераклиги ва ҳар томонлама тайёргарликдан сўнггина икки давлат раҳбарларининг эҳтимолий учрашуви ҳақида гапириш мумкинлигини айтди.