Россия Украина портлари ва кемаларига зарба берди

Россия Украинанинг Одесса ва Черноморск шаҳарларидаги порт инфратузилмаси ҳамда Украина ҳарбийларини қўллаб-қувватлаган кемаларга зарба берди. Бу ҳақда Россия Мудофаа вазирлиги кеча, 22 июль куни хабар қилди.

Вазирлик баёнотига кўра, сўнгги зарбалар Черноморск портида юк тушираётган қуруқ юк кемаси, ҳарбий юк омбори, шунингдек, ёнилғи ва мойлаш материаллари сақланадиган омборларга қаратилган.

Шунингдек, Одессадаги юклаш ва сақлаш иншоотлари, Украина ҳарбийлари учун юк олиб келаётган қуруқ юк кемаси ҳамда балкер туридаги кемага ҳам зарба берилгани айтилган. Вазирликка кўра, Россия дронлари Украина дронлари сақланаётган учта омборни ҳам нишонга олган.

Россия Мудофаа вазирлигининг 22 июль кечқурун Telegram орқали тарқатган қўшимча баёнотида айтилишича, кун давомида Россия дронлари Қора денгиз сувларида ва Черноморск портида тўртта юк кемаси ҳамда битта балкерга зарба берган. Россия томони бу кемалар Украина ҳарбийлари манфаатига хизмат қилаётган юкларни ташиганини иддао қилган.

Уруш бошланганига қарийб тўрт ярим йил бўлар экан, Россия ва Украина Қора денгиз ҳамда Азов денгизи атрофидаги ҳарбий фаолликни кучайтирди. Ҳар икки томон ўнлаб кемалар, жумладан нефть танкерлари ва юк кемаларига ҳужум уюштирмоқда.

Эслатиб ўтамиз, аввалроқ Россия ҳарбийлари Қора денгизда Украинанинг Одесса соҳиллари яқинида халқаро юк кемасига зарба бериши оқибатида камида 5 нафар экипаж аъзоси ҳалок бўлган эди.