Россия Тартусдаги базадан катта миқдордаги техникани эвакуация қилди
Олам
−
28 Январь
10167Суриянинг Тартус портидаги Россия ҳарбий базасидан ҳарбий техникаларни олиб чиқиш бошланди. Сунъий йўлдош тасвирлари юклаш жараёнини Россия ҳарбий флоти жанговар кемаси кузатиб бораётганини кўрсатмоқда. Бу ҳақда BBC Verify хабар берди.
Манбаларга кўра, жорий йил 24 январь куни куни Тартус портига санкция остида бўлган Оборонлогистика компаниясига тегишли Спарта ва Спарта II юк кемалари етиб борган. Сунъий йўлдош тасвирларига қараганда, ўтган ҳафтада порт ҳудудига кўплаб ҳарбий техника олиб келинган. Тасвирларда ўнлаб транспорт воситалари ва катта ҳажмдаги ускуналар кўринади. BBC хабарига кўра, Россия ҳарбийлари Тартусга техникани декабрь ўрталарида, Башар Асад режими ағдарилганидан сўнг тўплай бошлаган. Россиянинг бошқа Сурия ҳудудларидан Тартусга ҳаракатланган техника колонналари сунъий йўлдош объективига тушган.
Эслатиб ўтамиз, бир ҳафта олдин Тартус божхона бошлиғи Риёд Жудий янги Сурия ҳукумати “Стройтрансгаз” билан 2019 йилда портни модернизация қилиш учун тузилган 49 йиллик шартномани бекор қилганини эълон қилганди. Шартнома бўйича компания кейинги тўрт йилда порт инфратузилмасига 500 миллион доллардан ортиқ сармоя киритиши лозим эди. Энди портни қайта тиклаш ишларини сурияликларнинг ўзлари амалга оширади. Шундан сўнггина Россия кемаларига портга киришга рухсат берилган, аввал улар ҳарбий кемалар кузатувида Сурия соҳилларида сузиб юрган.
Ҳарбий-денгиз таҳлилчиси Фредерик ван Локереннинг фикрича, ҳозир портда Россиянинг яна икки ҳарбий кемаси – “Иван Грен” ва “Александр Отраковский” турган бўлиши мумкин. Улар ҳам эвакуацияда ёрдам бераётган бўлиши эҳтимолдан холи эмас. Бу маълумотни Украина ҳарбий разведкаси ҳам тасдиқлаган.
“49 йиллик ижарани бекор қилиш ортидан Россия Тартусдаги ҳарбий мавжудлигини сақлаб қолиш имконига эга эмаслиги аниқ бўлди. Шу сабабдан, бу ердан эвакуацияни чўзиб ўтирмасдан чиқиб кетиш тўғрисида қарор қабул қилинди”, дея изоҳ берди ван Локерен.
Шу билан бирга, техника ва ускуналарни олиб чиқиш жараёни маълум вақт талаб қилиши ҳақида Яқин Шарқ институтининг Сурия бўйича дастури вакили Антон Мардасов қайд этди.
Спарта II портдан чиққанидан кейин сунъий йўлдош тасвирлари бўйича кўплаб контейнерлар ва ҳарбий техника йўқолгани кузатилган. Ҳозирда Спарта кемасига юклаш ишлари давом этмоқда. Норвегиялик ҳарбий-денгиз таҳлилчиси Тур Аре Иверсеннинг таъкидлашича, эвакуация жараёнини Россия денгиз флоти “Грачонок” классидаги диверсияга қарши қайиғи кузатмоқда.
Россия армиясининг кўплаб техника ва жиҳозлари асосан ҳаво йўли орқали олиб чиқилмоқда. Россиянинг ҳарбий авиацияси билан боғлиқ Fighterbomber канали маълумотига кўра, кемалар фақат самолётда олиб ўтиш имконсиз ёки қимматга тушадиган юкларни ташимоқда. BBC шунингдек, Сурия Хмеймимдаги Россия авиабазасида фаоллик давом этаётганига эътибор қаратди. Сунъий йўлдош тасвирлари Асад Сурия ҳудудидан қочганидан бери катта юк ташувчи Россия самолётлари мунтазам равишда ҳарбий техника билан юкланаётганини кўрсатмоқда.
LiveБарчаси
18 Февраль
18 Февраль