Россия сафарбарликнинг янги тўлқинига тайёрланмоқда – Британия разведкаси 

Россия сафарбарликнинг янги тўлқинига тайёргарлик кўрмоқда. Бу ҳақда Буюк Британия разведкаси X'даги саҳифасида маълум қилди. 

Қайд этилишича, Россия сўнгги икки ой ичида қуруқликдаги қўшинларини кучайтириш учун янги тузилмаларни шакллантиришни бошлаган бўлиши мумкин. Ушбу тузилмаларга 25-бирлашган қуролли армия ҳам киради. Мамлакат Украинага бостириб кирганидан буён ўрнатилган тузилмаларни тўлдириш ёки ҳудудий мудофаа пиёда полкларининг бир қисми сифатида асосан сафарбар қилинган захирадаги ҳарбий хизматчилардан фойдаланган. У камдан-кам ҳолларда ўзини-ўзи таъминлаш учун янги мақсадли қўшма қуролли армияларни ташкил этган. 

Аммо 2022 йилнинг ёзида ташкил этилган 3-армия корпуси бундан мустасно эди. Эндиликда, эҳтимол, Россия захирадаги куч сифатида ҳар қандай янги тузилмани жойлаштириши мумкин. Шунга қарамай, разведка ҳисоботида айтилишича, Россия яқин истиқболда НАТОга қарши кучларини мустаҳкамлашга интилади. 

“Мажбурий сафарбарликнинг янги тўлқинисиз, Россия ҳатто битта янги армияни таъминлаш учун етарли миқдорда қўшин йиға олмаслиги мумкин”, дейилади хабарда. 

Эслатиб ўтамиз, аввалроқ, жорий йилнинг май ойида Москвага дронлар ҳужуми уюштирилганидан сўнг Рамзан Қодиров ва Дмитрий Рогозинлар Россияда иккинчи сафарбарлик тўлқинини эълон қилиш зарурлигини таъкидлаган эди. Шунингдек, Евгений Пригожин ҳам умумий сафарбарлик эълон қилиш вақти келганини айтган.