Россия Норвегия қарорига қатъий жавоб қайтармоқчи

Агар Норвегия икки рус компаниясига ўз сувларида балиқ овлашни тақиқлаш қарорини қайта кўриб чиқмаса, Россия Норвегиянинг балиқ овлаш кемаларини ўзининг иқтисодий ҳудудига киритмаслигини маълум қилди. Бу ҳақда Россия Федерал балиқ хўжалиги агентлигининг раҳбари Илья Шестаков баёнот берди.

Унинг сўзларига кўра, бундан буён Норвегия денгизларида балиқ овлаш ва квоталарни тақсимлаш Россиянинг миллий манфаатларидан келиб чиқиб амалга оширилиши керак. Шестаков Норвегиянинг бу қарорини Шимолий Атлантикадаги балиқчиликни бошқариш тизимини издан чиқарувчи қадам, дея баҳолаган. Россия ва Норвегия ўртасидаги балиқчилик бўйича қўшма комиссия 1976 йилдан бери фаолият юритиб келади. Томонлар ҳатто Совуқ уруш даврида ҳам мажбуриятлардан воз кечмаган эди.

Маълумот учун, Европа Иттифоқи 2025 йилнинг май ойида Россияга тегишли “Норебо” ва “Мурман СиФуд” компанияларининг кемаларига санкция жорий қилиб, уларнинг жосусликка оид технологиялардан фойдалангани ҳақида баёнот берган. Июль ойида эса Норвегия ҳам ушбу чекловларга қўшилиб, рус кемаларига ўз портларига кириш, таъмирлаш ва балиқ туширишни тақиқлаган. 

Эслатиб ўтамиз, аввалроқ Россиянинг “Урса Майор” юк кемаси Ўрта Ер денгизида Испания ва Жазоир ўртасида чўкиб кетганди.