Россия мигрантларни тиббий кўрикдан ўтказишни кучайтириши мумкин

Россияда ишлаш учун келаётган хорижликларга нисбатан қўшимча тиббий талабларни жорий этиш бўйича қонун лойиҳаси ишлаб чиқилмоқда. Бу ҳақда Давлат Думасининг Меҳнат қўмитаси раиси Ярослав Нилов Telegram-каналида ёзиб қолдирди. 

Таклифга кўра, ҳозирда амал қилаётган тиббий суғуртага қўшимча равишда, мигрантлар наркотик ва психотроп моддалар мавжуд эмаслигини тасдиқловчи тест натижаларини, ОИВ (ВИЧ), B ва C гепатити, сил (туберкулёз) ҳамда сифилиз йўқлиги ҳақида янгиланган тиббий маълумотномани тақдим этишлари лозим бўлади.

“Россияга ишлаш учун келаётган чет элликлар бизнинг муаммоларни ҳал қилиши керак, ўз муаммоларини эмас”, деган Нилов. 

Депутатнинг қўшимча қилишича, агар кўрсатилган тиббий ҳужжатлардан бирортаси етишмаса, мигрантлар қайтариб юборилади. 
Ушбу қонуннинг бошқа тафсилотлари ҳозирча ошкор этилмаган. 

Эслатиб ўтамиз, аввалроқ Россия Давлат Думасида бу ҳафта мигрантлар учун янги давлат божлари жорий этишга оид қонун лойиҳалари кўриб чиқилиши ҳақида хабар берилганди. Янги тартибга кўра, чет эллик фуқаролар ёки фуқаролиги бўлмаган шахсларга патент бериш ёки уни қайта расмийлаштириш учун 4200 рубль, меҳнат рухсатномасини узайтириш учун яна 4200 рубль, патент ёки рухсатнома нусхасини бериш ва унга ўзгартириш киритиш учун эса 2100 рубль бож тўлаши керак.