Россия Киевни бомбардимон қилди. Қурбон бор

Бугун, 19 июлга ўтар кечаси Россия томонидан Киевга берилган ёпирилма зарбалар оқибатида бир киши ҳалок бўлди, яна 16 киши жароҳатланди. Бу ҳақда Украина Президенти Владимир Зеленский маълум қилди.

Унинг сўзларига кўра, бу Россия Федерациясининг Киевга уюштирган энг йирик ҳаво ҳужумларидан бири. 
Украина Фавқулодда вазиятлар давлат хизмати (ФВДХ) маълумотларига кўра, Украина пойтахтининг бешта тумани — Соломенский, Шевченковский, Святошинский, Деснянский ва Днепровский туманлари зарба остида қолган. У ерда тураржой ва нотурар жой биноларида ёнғинлар юз берган, автомобиллар ёниб кетган. 

Ўққа тутиш пайтида портлаш тўлқини оқибатида “Лукьяновская” метро станциясининг ер усти вестибюли шикастланган. Станция вақтинча ёпилган. 

Киев вилоятининг Бучанский туманида эса омборхоналар ва “логистика объекти” ҳудудида ёнғинлар содир бўлган. Дастлабки маълумотларга кўра, икки киши жароҳатланган. 

Запорожье вилоятида Россиянинг учувчисиз учиш аппарати йўловчи поездига бориб урилган. Йўловчилар олдиндан эвакуация қилинган. Дастлабки маълумотларга кўра, поезд кузатувчиси енгил жароҳат олган. 

Россия Мудофаа вазирлиги россиялик ҳарбийлар Украинага ракеталар ва дронлар билан ёпирилма зарба берганини тасдиқлаган. Вазирликнинг даъво қилишича, Киев ва Киев вилоятидаги ҳарбий саноат корхоналари ва логистика марказлари, шунингдек, Одесса вилоятидаги “Южний” порти инфратузилмаси ҳужум нишонлари бўлган. 

Украина Қуролли кучлари Ҳаво кучлари қўмондонлигининг билдиришича, Россия Украина бўйлаб жами 41 та ҳар хил турдаги ракета ва 125 та учувчисиз учиш аппарати учирган. Улардан 23 та ракета ва 10 та дрон нишонларга теккани қайд этилган. Ҳужумнинг асосий йўналиши Киев шаҳри бўлган. 

Қайд этиш жоиз, Россия кенг кўламли уруш бошланганидан бери Украина пойтахтини мунтазам равишда ўққа тутиб келади. Июль ойи бошидан буён ҳужумлар частотаси ортган: Россия қўшинлари шаҳарга ҳафтада бир неча бор зарбалар бермоқда.

Эслатиб ўтамиз, аввалроқ Украина Учувчисиз тизимлар кучлари Қора ва Азов денгизларида Россиянинг “соя флоти”га тегишли яна 13 та кемага зарба берганди.