Россия кенг кўламли ҳужумга тайёрланмоқда – ОАВ

Россия қўшинлари яқин ҳафталарда янги ҳужум бошлашга тайёрланмоқда. Бу ҳақда Украина расмийлари билан суҳбатлашган “Associated Press” хабар берди.

Маълум қилинишича, Кремль Украинага максимал босим ўтказиш ва ўт очишни тўхтатиш бўйича музокараларда ўз позициясини кучайтиришга интилмоқда.

Шу билан бирга, Украина Президенти Владимир Зеленский разведка маълумотларига таяниб, Россия Суми, Харков ва Запорожье вилоятларининг шимоли-шарқида янги ҳужумларга тайёрланаётганини айтган.  

“Улар музокараларни чўзмоқда ва фақат вақтдан ютиш, кейин эса кўпроқ ерни эгаллаб олишга уриниш учун АҚШни сохта “шартлар” бўйича чексиз ва маъносиз мунозараларга тортишга ҳаракат қилмоқда”, деган нашр билан суҳбатлашган Украина вакиллари.

Уларнинг сўзларига кўра, Россия Президенти Владимир Путин “ҳудуд бўйича музокараларни кучлироқ позициядан олиб боришни хоҳлайди”.

Қайд этилишича, Москва АҚШнинг 30 кунга зудлик билан ва тўлиқ ҳарбий ҳаракатларни тўхтатиш таклифини амалда рад этган, Кремль музокарачилари узоқ муддатли шартларни илгари сурганидан кейин Қора денгизда ўт очишни қисман тўхтатиш мақсадга мувофиқлиги шубҳа остига олинган.

Украиналикларнинг таъкидлашича, яқинда Россия тактик позицияларини яхшилаш учун ҳужумларни кучайтирган.

“Уларга май ойигача вақт керак, холос”, деган нашр манбалари.

Манбага кўра, шимолда Россия ва Шимолий Корея аскарлари Курск вилоятининг катта қисмини Россияга қайтариб олишга муваффақ бўлди. Шарқий фронтда Донецк ва Запорожьеда ҳам жанглар авж олган. Баъзи қўмондонлар Россия жангларда тобланган кучларни Курскдан Украина шарқига қайтариши мумкинлигидан хавотирда.

“Бу оғир бўлади. Курск кучлари ўз ғалабаларидан хурсанд бўлади”, деди Донецк вилоятидаги Украина батальони қўмондони.

Шу билан бирга, ҳарбий таҳлилчиларга кўра, Россия фронтда олти ойдан тўққиз ойгача – “деярли бутун 2025 йил” давом этиши керак бўлган ҳужум ҳаракатларини тайёрламоқда.

Эслатиб ўтамиз, аввалроқ Украина Мудофаа вазирлиги Бош разведка бошқармаси вакили Вадим Скибицкий “Европа хавфсизлигининг янги контурлари” мавзусидаги давра суҳбатида Россия АҚШ ва Хитой даражасига етиб олиш учун Украинадаги урушни 2026 йилгача ҳал қилишни мўлжаллагани ҳақида гапирганди.