Россия G7'га қайта қабул қилиниши керак – Трамп

north_east

Путин Трамп билан деярли 1,5 соат телефонда гаплашди

АҚШ Президенти Дональд Трамп Россиянинг G7 таркибига қайтишини исташини ва Москванинг четлатилгани хато бўлганини айтди. Бу ҳақда у кеча, 13 февраль куни Оқ уйда АҚШнинг янги жавоб тарифлари ҳақида гапирганда сўз очди.

“Мен Россияни мамнуният билан қайтараман. Менимча, уларни ташлаб юбориш хато бўлди. Қулоқ солинг, гап Россияни ёқтириш ёки ёқтирмасликда эмас. Бу G8 эди. Агар G8 бўлганида, Украина билан ҳеч қандай муаммо бўлмаслиги мумкин эди. Ва агар мен президент бўлганимда, Украина билан ҳеч қандай муаммо бўлмаслиги аниқ. Россия ҳеч қачон Украинага ҳужум қилмайди”, деди Америка раҳбари.

Россия 2014 йилда Украинанинг Қрим ярим ороли аннексия қилинганидан кейин Москва чиқариб юборилгунга қадар ўша пайтда G8 номи билан машҳур бўлган G7 саноат демократияси клуби аъзоси эди. Трамп Россиянинг иттифоқдан чиқарилишини АҚШнинг ўша пайтдаги президенти Барак Обаманинг хатоси деб атади.

“Мен айтдим: Нима қиляпсиз? Ҳамма гаплар Россия ҳақида, улар ҳам шу столда бўлишлари керак”. Ўйлайманки, Путин қайтишдан хурсанд бўлади”, деди АҚШ Президенти.

Бу йил G7'га раислик қилаётган Канада Трампнинг изоҳларига жавоб бермади.

Эслатиб ўтамиз, кеча, 13 февраль куни АҚШ Президенти Дональд Трамп 14-16 февраль кунлари Германиянинг Мюнхен шаҳрида бўлиб ўтадиган хавфсизлик конференцияси доирасида АҚШ ва Россия расмийлари учрашишини ва Украина ҳам таклиф этилганини билдирганди, бироқ Киев Германияда Россия билан музокара ўтказишни кутмаганлигини маълум қилди.