Россия Эрон халқига кўмаклашиш учун ҳаракат қилмоқда – Путин (видео)

Бугун, 23 июнь куни Россия Федерацияси Президенти Владимир Путин Кремлда Эрон Ташқи ишлар вазири Аббос Ароқчи билан учрашув ўтказди. Бу ҳақда Кремль матбуот хизмати хабар берди.

“Сиз Россияга ниҳоятда мураккаб даврда – минтақада ва мамлакатингиз атрофида кескинлик кучайган бир пайтда ташриф буюрдингиз. Бизнинг содир бўлаётган воқеаларга нисбатан позициямиз яхши маълум. Бу Россия номидан Ташқи ишлар вазирлиги томонидан аниқ ифодаланган ва сиз БМТ Хавфсизлик Кенгашида биз эгаллаган позициядан хабардорсиз”, деган Путин.

Шунингдек, у Эронга қарши АҚШ томонидан содир этилган тажовуз бутунлай асоссиз ва ҳеч қандай оқловга эга эмас эканини, Россия Эрон билан узоқ йиллик дўстона ва ишончли алоқаларга эгалигини айтган.

“Биз ўз навбатида Эрон халқига кўмаклашиш учун ҳаракат қиляпмиз. Сиз бугун Москвадасиз – бундан мамнунман. Бу бизга бу оғир масалаларни муҳокама қилиш ва мавжуд вазиятдан чиқиш йўллари устида биргаликда фикр юритиш имконини беради”, дейди Россия етакчиси.

Эрон Ташқи ишлар вазири эса Россияга “Исроил ва АҚШнинг ҳаракатларини қатъий қоралагани” учун миннатдорлик билдирган. Унинг сўзларига кўра, Россия “тўғри томонда” турибди.

Ароқчи, шунингдек, Яқин Шарқдаги зиддиятнинг кескинлашуви АҚШ ва Исроилнинг Эрондаги ядровий объектларга нисбатан ҳаракатлари туфайли юзага келганини таъкидлаган.

У Россия Эроннинг тинч атом дастурида ҳар доим ҳамкор бўлиб келганини, шунингдек, Москва Теҳрон ядровий дастури бўйича музокараларда ижобий роль ўйнаганини қўшимча қилган.

“Эрон АҚШ ва Исроилнинг ўз ҳудудидаги ҳаракатларини ноқонуний деб ҳисоблайди, шу боис, Теҳрон ўзини ҳимоя қилиш ҳуқуқига эга”, дейди Эрон Ташқи ишлар вазири.

Эслатиб ўтамиз, аввалроқ Россия Президентининг матбуот котиби Дмитрий Песков “Коммерсанть” саволига жавобан Россия Эрон-Исроил можаросида Эрон томонига ҳарбий ёки бошқа турдаги ёрдам кўрсатиши Теҳроннинг қандай расмий сўров билан мурожаат қилишига боғлиқ бўлишини айтган эди.

Шунингдек, Эрон Ташқи ишлар вазири Аббос Ароқчи Москвага боргани ва у ерда мамлакат Президенти Владимир Путин билан учрашиши хабар қилинган эди. Кеча, 22 июнь куни Россияга етиб келган Ароқчи ўз интервьюсида янги хавфли шароитда, глобал тартиб издан чиқаётган бир пайтда Москвадаги маслаҳатлашувлар ниҳоятда муҳим аҳамиятга эга эканини айтган.