Россия АҚШ билан муносабатларда илк қадамни ташлади – Песков

Ар-Риёдда ўтказилган музокаралар чоғида мамлакатлар ўртасидаги муносабатларни тиклаш учун биринчи қадам ташланди. Бу ҳақда Россия Президенти матбуот котиби Дмитрий Песков журналистлар билан бўлиб ўтган мулоқотда маълум қилди.

Президент вакилининг сўзларига кўра, хулоса чиқаришга ҳали эрта, аммо кайфият ишчан давом этмоқда.

“Ўтган музокаралар Россия-Украина можаросини ҳал қилиш йўлидаги муҳим қадам бўлди”, деган Песков.

У, шунингдек, Россия-АҚШ ўртасидаги муносабатлар ушбу учрашувдан сўнг анча яхшиланганини маълум қилган.

“Фойдали тинчлик шартномаси учун шарт-шароит яратиш йўлида жуда муҳим қадам қўйилди. Ҳар икки томонда зарур сиёсий ирода намоён бўлди – бу ҳолатда мен Россия ва АҚШни назарда тутяпман”, деган матбуот котиби.

Шу билан бирга, у Россия-Америка муносабатлари қайта жонлантириш, кейин эса тиклаш кераклигини таъкидлаган.

“Бу жуда узоқ, табиийки, ҳаммасини бир кунда ёки бир ҳафтада тузатишнинг иложи йўқ. Шундай қилиб, узоқ йўл бор”, деган Кремль вакили.

Песков учрашувдаги энг муҳим нуқта – Путин ва Трамп ўртасидаги учрашув ҳақида ҳам маълумот берган.

“Президентлар Дональд Трамп ва Владимир Путиннинг учрашуви Ташқи ишлар вазирлигидан тайёргарликни талаб қилади. Уларнинг учрашуви февраль ойининг охиригача бўлмаслиги мумкин”, деган у.

Эслатиб ўтамиз, кеча, 18 февраль куни Саудия Арабистони пойтахти Ар-Риёд шаҳрида бўлиб ўтган Америка ва Россия делегациялари ўртасидаги музокаралар доирасида АҚШ Давлат котиби Марко Рубио ва Россия Ташқи ишлар вазири Сергей Лавров учрашганди. Учрашув АҚШ Президенти Дональд Трампнинг Россия Президенти Владимир Путин билан жорий йилнинг 12 февраль куни бўлган мулоқотнинг давоми сифатида ташкил этилган. Давлат котиби Рубио билан бирга Миллий хавфсизлик бўйича маслаҳатчи Майк Уолтц ва Трамп томонидан икки томонлама муносабатларни қайта тиклаш учун танланган махсус элчи Стив Уиткофф ҳам иштирок этган. Лавровга эса Россия Президенти ёрдамчиси Юрий Ушаков ҳамроҳлик қилган.