Россия 7 та чегара ўтиш пунктини ёпди

Россия ҳукумати Финляндия, Эстония ва Латвия билан еттита темир йўл чегара ўтиш пункти фаолиятини тўхтатиш тўғрисида қарор қабул қилди. Бу ҳақда “The Moscow Times” хабар берди.

Қарор кеча, 1 июлдан кучга кирган ва унга мувофиқ мазкур пунктлар орқали йўловчилар, транспорт воситалари ҳамда юк поездларининг ҳаракати тўлиқ тўхтатилган.

Ёпилган 7 та темир йўл ўтиш пунктининг 5 таси Финляндия, 2 таси эса Эстония ва Латвия билан чегарада жойлашган. Россия ҳукумати ҳозирча ушбу чекловлар жорий этилишининг сабаблари ёки улар қанча муддат амал қилиши ҳақида расмий изоҳ бермаган.

Шу билан бирга, Россиянинг барча темир йўл алоқалари узилмаган. Эстония билан чегарадаги Ивангород темир йўл ўтиш пункти ҳамда Латвия билан чегарадаги Себеж ўтиш пункти ўз фаолиятини давом эттирмоқда. Бироқ Финляндия билан чегарадаги барча темир йўл ўтиш пунктлари ёпилгани сабабли икки давлат ўртасида темир йўл орқали тўғридан тўғри қатнов ва юк ташиш имконияти қолмаган.

Бу қарор Россиянинг Финляндияга темир йўл орқали амалга оширадиган экспортига ҳам таъсир қилади. Хусусан, Россия Финляндияга минерал ўғитларнинг бир қисмини айнан темир йўл орқали етказиб бериб келган.

Маълумот учун, Россия ва Финляндия ўртасидаги чегара муносабатлари сўнгги йилларда кескинлашган. 2023 йил апрель ойида Финляндия НАТОга аъзо бўлгач, икки давлат ўртасидаги муносабатлар совуқлашган. Ўша йилнинг декабрь ойида эса Финляндия бошпана изловчилар оқими кескин кўпайганини сабаб қилиб, Россия билан шарқий чегарадаги автомобиль ва пиёдалар ўтиш пунктларини номаълум муддатга ёпган.

Ҳозирча Россиянинг бу чеклови вақтинчалик экани ёки доимий тус олиши юзасидан расмий маълумот берилмаган.

Эслатиб ўтамиз, аввалроқ Россияда бензин ва авиация керосини экспортига вақтинчалик тўлиқ тақиқ жорий этилган эди.