Россия 2025 йилда Украинанинг 1 фоиздан кам ҳудудни босиб олди – Путин

Россия қўшинларининг Украинадаги ҳужум суръати секинлашди, 2025 йилда эса Украинанинг бор-йўғи 1 фоиздан кам ҳудуди устидан назорат ўрнатилди. Бу ҳақда кеча, 7 октябрь куни Россия Президенти Владимир Путин Мудофаа вазирлиги ва Бош штаб раҳбарияти билан бўлган йиғилишда сўз очди.

Путинга кўра, 2025 йил бошидан бери Россия қўшинлари “деярли беш минг квадрат километр – аниқроғи, 4900 кв км майдон ва 212 та аҳоли пунктини” эгаллаган.

Украина нашрлари ҳам август ойида шунга яқин рақамларни эълон қилган, аммо бу кўрсаткичлар Россиянинг бутун уруш давомида қўлга киритган ютуқларига нисбатан жуда кичик эканини таъкидлаган. Уларнинг ҳисоб-китобига кўра, Россия 2022 йил 12 ноябрдан 2025 йил 17 августгача атиги 5842 кв км ҳудудни эгаллаган. Бу эса Украина ҳудудининг 0,97 фоизига тенг. Уруш бошланганидан бери эса умумий ҳисобда 108 651 кв км ҳудуд босиб олинган.

Путин тилга олган 4900 кв км ҳудуд Донецк (26 517 кв км) ва Луганск (27 183 кв км) вилоятларининг майдонига нисбатан бир неча баравар кичик. 

2025 йилнинг августи охирига келиб, Украина Қуролли кучлари Донецк вилоятининг тахминан 30 фоизини, яъни 8 минг кв км'га яқин ҳудудни назорат қилиб турган. 

Шу ўринда, Украина Президенти Владимир Зеленский Россиянинг сезиларли ютуқларга эриша олмаётганини таъкидлаб келмоқда. 

Эслатиб ўтамиз, аввалроқ АҚШ Украинага Россия ҳудудининг чуқур қисмига зарбалар бериш учун зарур бўлган разведка маълумотларини тақдим этиши ҳақида хабар берилганди. Президент Дональд Трамп АҚШ разведка хизматлари ва Пентагонга Киевга бу йўналишда ёрдам беришга рухсат берган.