Роналду Трамп билан учрашади

Португалия терма жамоаси сардори Криштиану Роналду 2026 йилги футбол бўйича Жаҳон чемпионати бошланишидан бир неча ой олдин Оқ уйга ташриф буюради. Футболчи АҚШ Президенти Дональд Трамп билан учрашиши кутилмоқда. Бу ҳақда “Mundo deportivo” нашри хабар берди.

Манбага кўра, Президент Трамп Португалия терма жамоасининг мундиалга муваффақиятли йўл олганини эътироф этиш мақсадида Роналдуни қабул қилади. Португалия терма жамоаси ҳужумчиси келаси йилги мундиалнинг энг кўзга кўринган иштирокчиларидан бири бўлиши кутилмоқда. Шунингдек, Португалия ва АҚШ терма жамоалари ўртасида турнир олдидан ўртоқлик учрашуви ўтказилиши мумкинлиги ҳақида ҳам хабарлар тарқамоқда. Бу америкалик мухлисларга чемпионат бошланишидан аввал Роналдуни майдонда кўриш имконини яратади.

Дональд Трамп бундан аввал ҳам FIFA президенти Жанни Инфантинони бир неча бор Оқ уйда қабул қилган. Энди Роналду ҳам Президент билан учрашган юқори даражадаги футбол арбоблари қаторига қўшилади. Маълумотларга кўра, Роналду Трамп билан учрашишга ўзи ҳам қизиқиш билдирган ва ташриф расмий равишда тасдиқланган.

Хабарларга кўра, Роналдунинг Оқ уйга ташрифи куни АҚШ Президенти Саудия Арабистони валиаҳд шаҳзодаси Муҳаммад бин Салмон билан ҳам учрашади. Ушбу икки учрашув ўзаро боғлиқми ёки йўқ?  Ҳозирча номаълум. Ҳозир “Ал-Наср” сафида тўп сураётган Роналду Саудияга алоқадор шахслар билан боғлиқ дипломатик контекстда ҳам эътибор марказида қолмоқда.

Эслатиб ўтамиз, аввалроқ Португалия терма жамоаси футболчиси Криштиану Роналду журналист Пирс Морганга берган интервьюсида АҚШ Президенти Дональд Трампдан машҳурроқ эканини айтган эди.