Роналду Саудия Арабистони клубига ўтишини рад этди

Португалия терма жамоаси футболчиси Криштиану Роналду Саудия Арабистонининг “Ал-Наср” клуби билан келишув тузмаган. Бу ҳақда Португалиянинг “Record” нашри хабар берди.

У “Ал-Наср” билан шартнома тузилгани борасида берилган саволга:
“Йўқ, бу ҳақиқат эмас”, деб жавоб берган.

Роналду “Манчестер Юнайтед” билан шартномасини бекор қилгандан сўнг эркин агентга айланди. Бунга унинг журналист Прис Морганга берган шов-шувли интервьюси сабаб бўлди. Яъни Роналду “Манчестер Юнайтед”даги шароитлардан тортиб, бош мураббий Эрик тен Хаг ҳақида ҳам кескин фикрларни билдирган.

Эслатиб ўтамиз, Испаниянинг “Маrca” нашри португалиялик ҳужумчи “Ал-Наср” клуби билан шартнома бўйича келишиб олгани ва трансфер 1 январь куни амалга ошиши ҳақида хабар берган эди. 2,5 йиллик келишувнинг умумий миқдори 200 миллион еврони ташкил қилиши кутилганди. Агарда Роналду ушбу таклифни қабул қилса, дунёнинг энг кўп маош олувчи спортчисига айланарди.

Маълумот учун, Криштиану Роналду 37 ёшда ва 2023 йилнинг 5 февралида 38 га киради. У 5 карра “Олтин тўп” соҳиби, 5 карра Чемпионлар лигаси ғолиби, Европа чемпиони, Миллатлар лигаси ғолиби ҳисобланади. Португалиялик футболчи терма жамоалар, Европа чемпионатлари, Чемпионлар лигаси, клублар ўртасидаги жаҳон чемпионати ва “Реал Мадрид” тарихидаги энг яхши тўпурар саналади. 

Ҳужумчи “Манчестер Юнайтед”га 2021 йилнинг ёзида келиб қўшилган. Футболчининг “Юнайтед”даги дастлабки фаолияти 2003–2009 йилларга тўғри келади. Криштиану “Манчестер Юнайтед”дан ташқари Португалиянинг “Спортинг”, Испаниянинг “Реал Мадрид” ва Италиянинг “Ювентус” клубларида тўп тепган.