“Реал” президентликка номзод жамоага Ҳоланд ва Клоппни олиб келмоқчи

“Реал” президентлик сайловида Мадрид клубининг амалдаги раҳбари Флорентино Переснинг асосий рақиби Энрике Рикельме сайловда ғалаба қозонса, клубга Ҳоланд ва Клоппни олиб келишга ваъда бермоқда. Бу ҳақда “El Confidencial” нашри хабар берди.

Манбага кўра, 37 ёшли испаниялик бизнесмен “Реал Мадрид” президентлик сайлови дастурида иккита машҳур режани тайёрлаган. Булар Юрген Клоппни бош мураббий этиб тайинлаш ва Эрлинг Ҳоландни жамоанинг янги юлдузига айлантириш.

Манбага кўра, Рикельме жамоаси норвегиялик “Манчестер Сити” ҳужумчиси билан Мадридга кўчиб ўтиш эҳтимолини баҳолаш учун алоқага чиққан. Ҳоланднинг инглиз клуби билан шартномаси 2034 йилгача амал қилади.

Рикельме, шунингдек, Клоппнинг “Лос Бланкос”ни бошқаришини истамоқда. Жозе Моуриньо эса, унинг лойиҳасида вариант сифатида кўриб чиқилмаяпти.

Хабарларга кўра, тадбиркор аллақачон Red Bull’нинг ҳозирги глобал футбол директори бўлиб ишлаётган Клопп агентлари билан бир нечта учрашув ўтказган ва немис мураббийини жамоани бошқаришга кўндиришга ҳаракат қилган.