“Реал”нинг собиқ футболчиси Германия клубига ўтмоқда

Испаниянинг “Реал Мадрид” жамоасини шу ёзда тарк этган испаниялик футболчи Лукас Васкес Германиянинг “Байер Леверкузен” клуби билан шартнома имзолайди. Бу ҳақда инсайдер Фабрицио Романо ижтимоий тармоқларда хабар берди.

Романонинг сўзларига кўра, эркин агентга айланган Васкес бугун, 26 август куни  “Байер Леверкузен” билан шартнома имзолайди. Футболчи аллақачон тиббий кўрикдан ўтган ва барча керакли музокараларни якунлаган.

Васкес “Реал Мадрид” жамоаси билан 16 йиллик фаолияти давомида 5 марта Чемпионлар лигаси, 4 марта Испания чемпионати, 4 марта UEFA Суперкубоги, 4 марта Испания Суперкубоги ва бир марта Испания кубоги соҳиби бўлган. “Реал Мадрид” жамоаси сафида 402 та ўйин ўтказиб, 42 та гол урган ва 79 та голли узатмани амалга оширган.

“Байер Леверкузен” жамоаси ўтган мавсумда Бундеслигани иккинчи ўрин билан якунлаган ва бу мавсум UEFA Чемпионлар лигасида ҳаракат қилади.

Маълумот учун, ҳозирги кунда “Transfermarkt ” порталида Лукас Васкес 3 млн еврога баҳоланган.