“Реал Мадрид”нинг яна бир футболчиси терма жамоа рўйхатидан чиқарилди

“Реал Мадрид” ҳимоячиси Дин Хёйсен мушакларидаги ноқулайлик туфайли Грузияга қарши ўйинда майдонга туша олмагани сабабли Испания терма жамоаси рўйхатидан олиб ташланди. Бу ҳақда Испания Футбол Федерацияси расмий баёнот берди.

Федерация маълумотларига кўра, Хёйсен 2026 йилги Жаҳон чемпионати саралашининг сўнгги босқичида Испания ва Туркия ўртасидаги ўйинда қатнаша олмайди. Ҳимоячи мушакларидаги ноқулайлик туфайли Грузияга қарши ўйинни ҳам ўтказиб юборган эди. Хёйсеннинг ҳолати яхшиланмагач, унга клубига қайтишга рухсат берилган.

Федерация баёнотида таъкидланишича, ўйинчининг соғлиги биринчи ўринга қўйилган, шунинг учун терма жамоа техник штаби Дин Хёйсен майдонга туша олмаслигини ҳисобга олиб, уни таркибдан чиқаришга қарор қилган. Шу билан бирга, Ламин Ямаль ва Нико Уильямс каби бошқа футболчилар ҳам жароҳат туфайли халқаро танаффусда ўйинларда қатнаша олмаган.

Дин Хёйсен “Реал Мадрид”нинг сўнгги ўйинида мушакларидаги ноқулайликдан шикоят қилган, аммо кейинчалик тузалиб, ҳафталик машғулотларда иштирок этган. Шу сабабли, ҳимоячи терма жамоа йиғинига жалб қилинган эди.

Испания терма жамоаси мураббийи Луис де ла Фуэнте Туркияга қарши ўйинга учта марказий ҳимоячи Кубарси, Ляпорт ва Вивианлардан фойдаланиш имкониятига эга. Мураббий Дин Хёйсенни ўрнига қўшимча ўринбосарни чақирмайди.

Эслатиб ўтамиз, аввалроқ “Реал Мадрид” ҳужумчиси Килиан Мбаппе ва Эдуардо Камавинга ҳам жароҳатлар сабаб Франция терма жамоаси лагерини тарк этган эди.