“Реал” Хавьер Тебаснинг истеъфосини талаб қилди

“Реал Мадрид” клуби Ла Лига президенти Хавьер Тебаснинг ўз лавозимидан зудлик билан истеъфога чиқишини талаб қилувчи баёнот эълон қилди. Клуб шунингдек, уни Испания Қироллик футбол федерацияси (RFEF) вице-президенти лавозимидан ҳам кетишга чақирди. Бу ҳақда клуб расмий сайти хабар берлди.

Бунга Тебаснинг “Реал Мадрид” бошқарув усулларини нацистлар Германиясининг тарғибот вазири Йозеф Геббельс қўллаган усуллар билан таққослаган фикрлари сабаб бўлди. Клубнинг таъкидлашича, бу жараёнда “Реал Мадрид ТВ” телеканали ҳам тилга олинган.

“Реал Мадрид” Испания футболидаги энг юқори бошқарув лавозимларидан иккитасини эгаллаб турган шахснинг клубимиз, унинг раҳбарияти ва телеканали обрўсига путур етказиш учун бундай таққослашга мурожаат қилишини мутлақо қабул қилиб бўлмайдиган ва ўта жиддий ҳолат деб ҳисоблайди. Унинг нацистлар мафкураси ҳақида гапирмаётганини изоҳлаши ҳам баёнотларининг ҳақоратли, ахлоқий жиҳатдан жирканч ва номақбул хусусиятини юмшатмайди”, дейилади клуб баёнотида.

Мадридликлар Тебаснинг бу фикрларини клубга қарши қаратилган бир қатор ҳужумларнинг навбатдагиси деб баҳолади. Клуб фикрича, Ла Лига раҳбари Негрейра ишини ҳал қилиш ва Испания футболида ислоҳотлар ўтказиш ўрнига ўз лавозимидан “Реал Мадрид”нинг обрўсини тушириш учун фойдаланмоқда.

“Хавьер Тебаснинг хатти-ҳаракатлари унинг вазифаларига мос келмайдиган бетарафлик, ҳурмат ва холислик етишмаслигини кўрсатмоқда. Унинг “Реал Мадрид”га ва шаффофликни талаб қилаётганларга қарши мунтазам ҳужумлари Испания футболи учун ҳақиқий таҳдиддир”, дея маълум қилган клуб.

Маълумот учун, 64 ёшли Хавьер Тебас 2013 йил апрелидан буён Ла Лига президенти лавозимида ишлаб келмоқда. У 2023 йил декабрь ойида тўртинчи муддатга қайта сайланган бўлиб, ваколати 2027 йилгача давом этади.